ماحولیاتی ماہرین کی رپورٹ کے مطابق، لاہور کا ایئر کوالٹی انڈیکس (AQI) 404 تک پہنچ گیا ہے، جس نے اسے دنیا کے آلودہ ترین شہروں کی فہرست میں دوسرے نمبر پر پہنچا دیا ہے۔

 

 کراچی 207 AQI کے ساتھ دنیا کے آلودہ شہروں میں پانچویں نمبر پر آ گیا ہے، جو کہ تشویش ناک صورتحال کی عکاسی کرتا ہے۔

 

 

پنجاب کے کئی شہروں میں اسموگ کی شدت میں قدرے کمی کے بعد حکومت نے معمولی نرمی کے اقدامات کیے ہیں۔ لاہور اور ملتان کے علاوہ صوبے کے دیگر علاقوں میں اسموگ کے باعث بند کیے گئے تعلیمی ادارے دوبارہ کھول دیے گئے ہیں۔

 

محکمہ ماحولیات کے مطابق ریسٹورنٹس اور ہوٹلز کو رات 10 بجے تک کھلے رہنے کی اجازت دی گئی ہے جبکہ ہوم ڈلیوری پر کوئی پابندی نہیں ہوگی۔ تاہم، آؤٹ ڈور کھیلوں اور دیگر غیر نصابی سرگرمیوں پر پابندی بدستور برقرار ہے۔

 

 

لاہور سمیت پورے پنجاب میں اینٹی اسموگ مہم تیزی سے جاری ہے۔ حکام نے آلودگی پھیلانے والے بھٹوں اور صنعتی یونٹس کے خلاف سخت کارروائیاں کی ہیں۔ سرکاری اعداد و شمار کے مطابق گزشتہ چند دنوں میں ملتان، خانیوال، سرگودھا، اور جھنگ میں غیر معیاری زگ زیگ ٹیکنالوجی کے بغیر چلنے والے بھٹوں کو منہدم کیا گیا ہے۔

 

اسی طرح، لاہور اور گوجرانوالہ میں آلودگی کا باعث بننے والے 20 صنعتی یونٹس کو ختم کیا گیا جبکہ فیروزوالہ میں 51 یونٹس کو بند کر دیا گیا ہے۔

 

 

 

 

سینئر صوبائی وزیر مریم اورنگزیب نے کہا کہ عوام کی صحت حکومت کی اولین ترجیح ہے۔ انہوں نے زور دیا کہ آلودگی کے مسئلے سے نمٹنے کے لیے اجتماعی کوششوں کی ضرورت ہے۔ 

 

شہر کے داخلی راستوں پر گاڑیوں کی جانچ اور سیف سٹی کیمروں سے نگرانی کا عمل بھی تیز کر دیا گیا ہے تاکہ آلودگی پر قابو پایا جا سکے۔

 

 

چند دن قبل پاکستان پیپلز پارٹی کے چیئرمین بلاول بھٹو زرداری نے سماجی رابطوں کی ویب سائٹ ایکس پر پاکستان کے مختلف شہروں کی ایئر کوالٹی ریڈنگز شیئر کیں۔ 

 

انہوں نے شہریوں کو کراچی منتقل ہونے کی تجویز دی تھی، یہ کہتے ہوئے کہ کراچی دیگر شہروں کی نسبت بہتر ایئر کوالٹی رکھتا ہے۔

 

تاہم، تازہ ترین اعداد و شمار کے مطابق، کراچی کی فضا بھی انتہائی مضر صحت ہو چکی ہے، جس سے ملک بھر میں فضائی آلودگی کے مسئلے کی سنگینی واضح ہوتی ہے۔

 

 

ماہرین نے فضائی آلودگی کو کم کرنے کے لیے سخت اقدامات کی ضرورت پر زور دیا ہے، جن میں پبلک ٹرانسپورٹ کی بہتری، صنعتی فضلہ کے مناسب انتظام، اور شجر کاری مہمات شامل ہیں۔ ماحولیاتی آلودگی پر قابو پانے کے لیے حکومتی عزم کے ساتھ عوامی تعاون بھی ناگزیر ہے۔