اے ٹی سی اسلام آباد نے علی امین گنڈا اور عامر مغل کی حاضری سے استثنیٰ کی درخواست مسترد کرتے ہوئے ناقابل ضمانت وارنٹ گرفتاری بھی جاری کردیے ہیں۔

عمران خان اور دیگر پی ٹی آئی رہنماؤں کیخلاف آئی9 اور تھانہ سنگجانی میں درج مقدمات سے متعلق کیس کی سماعت انسداد دہشتگردی عدالت کے اسلام آباد کے جج طاہر عباس سپرا نے کی۔

علی نواز  اعوان، عامر کیانی، واثق قیوم اور دیگر ملزمان عدالت میں پیش ہوئے جبکہ وزیر اعلیٰ خیبرپختونخوا علی امین گنڈاپور اور عامر مغل کی جانب سے حاضری سے استثنیٰ کی درخواست دائر کی گئی تھی۔

اے ٹی سی اسلام آباد کے جج طاہر عباس سپرا نے سماعت کے دوران ریمارکس دیئے کہ کسی کی حاضری سے استثنیٰ کی درخواست منظور نہیں ہوگی، یہ کوئی وجہ نہیں ہوسکتی کہ شہر سے باہر ہوں تو عدالت میں پیش نہیں ہوسکتا، حاضری پوری نا ہونا ملزمان پر ہے یا کورٹ پر ہے۔

پاکستان تحریک انصاف کے وکلا نے جواب دیا کہ حاضری پوری کرنا ملزمان پر ہے، جس پر جج نے کہا کہ جو جو لوگ غیر حاضر ہیں ان کے وارنٹ گرفتاری جاری ہوں گے، اگلی پیشی پر تمام ملزمان کی حاضری یقینی ہوگی۔

جج طاہر عباس سپرا نے کیس کی سماعت کرتے ہوئے کہا کہ غیر حاضر ملزمان کے ناقابل ضمانت وارنٹ گرفتاری جاری کر رہے ہیں، اگلی پیشی پر حاضری کی مکمل یقین دہانی کرائی جائےگی تو پھر وارنٹ کا معاملہ دیکھیں گے۔

پی ٹی آئی وکلا کی جانب سے بتایا گیا کہ ایک موقع دیا جائے اگلی پیشی پر تمام ملزمان عدالت میں حاضر ہوں گے، جس پر جج کا کہنا تھا جو ملزم 8 تاریخ کو نہیں آئیں گے ان کو اشتہاری قرار دیا جائے گا، عدالتی مفرور کو اشتہاری قرار دینے کیلئے 30 دن ضروری نہیں ہیں، میں نے ان کیسز کو انجام تک پہنچانا ہے، آپ کا ہی اس میں فائدہ ہوگا۔

اے ٹی سی جج کا کہنا تھا اگر کیسز میں جان ہوئی تو آگے چلیں گے ورنہ فوراً ہی ان کیسز کو فارغ کردوں گا، عدالت نے دونوں مقدمات کی سماعت 8 جولائی تک ملتوی کردی۔

جج طاہر عباس سپرا نے غصے کا اظہار کرتے ہوئے کہا کہ ایک آتا ہے دو نہیں آتے تماشا بنایا ہوا ہے، 8 جولائی کو کسی کو بخار ہو، کوئی بیمار ہو، کچھ بھی ہو، جو نہ آیا اسےاشتہاری قرار دیں گے، 8 جولائی کے بعد کیسز کی سماعت روز ہوا کرے گی۔

عدالت نے عمران خان کی ویڈیو لنک پیشی سے متعلق سپرینٹنڈنٹ اڈیالہ جیل سے تحریری جواب بھی طلب کر لیا۔