40 سالہ دائی سوکے ہوری، جو ٹوکیو میں رہتے ہیں، کا دعویٰ ہے کہ وہ گذشتہ 15 سالوں سے روزانہ صرف 30 منٹ کی نیند لیتے ہیں اور اس کے باوجود اپنی زندگی میں انتہائی خوش اور مطمئن ہیں۔

 

 

ہوری کا کہنا ہے کہ کم نیند نے انہیں زیادہ وقت فراہم کیا ہے جس سے وہ اپنی زندگی کو زیادہ بہتر طریقے سے گزار رہے ہیں۔ وہ اپنے دن کا آغاز ورزش سے کرتے ہیں اور روزانہ تقریباً 10 گھنٹے تک کام کرتے ہیں۔ اس کے ساتھ وہ باڈی بلڈنگ، سرفنگ، اور گھر کے کاموں میں بھی بھرپور حصہ لیتے ہیں۔

 

 

دائی سوکے ہوری ایک انتہائی مصروف زندگی گزارتے ہیں، جس میں ورزش، ملازمت، موسیقی، سرمایہ کاری اور اپنے خاندان کے ساتھ وقت گزارنا شامل ہے۔ وہ دن میں دو مرتبہ جم جاتے ہیں اور سالانہ باڈی بلڈنگ کے مقابلوں میں بھی حصہ لیتے ہیں۔ ہوری کا کہنا ہے کہ ان کے لیے صرف 30 منٹ کی نیند کافی ہوتی ہے کیونکہ انہوں نے اپنے جسم کو کم نیند کی عادت ڈال دی ہے۔

 

 

ہوری کا کہنا ہے کہ نیند بھی ایک پٹھے کی مانند ہے جسے آہستہ آہستہ کم کیا جا سکتا ہے۔ وہ دوسروں کو بھی نیند کے دورانیے کو کم کرنے کی تربیت دیتے ہیں اور ان کا کہنا ہے کہ زیادہ تر لوگ چھ ماہ کی تربیت کے بعد تین سے چار گھنٹے نیند پر گزر بسر کر سکتے ہیں۔

 

 

اگرچہ ہوری کا طرزِ زندگی منفرد اور متاثر کن ہے، مگر زیادہ تر ماہرینِ نیند اس بات پر زور دیتے ہیں کہ مناسب نیند جسم کے ہر عضو کے لیے ضروری ہے۔ نیشنل سلیپ فاؤنڈیشن کے مطابق، بالغ افراد کو رات کے وقت سات سے نو گھنٹے کی نیند لینی چاہیے۔ نیند کی کمی سے مدافعتی نظام کمزور ہو سکتا ہے اور دیگر صحت کے مسائل پیدا ہو سکتے ہیں۔

 

 

ہوری کا دعویٰ ہے کہ وہ کم نیند کے باوجود اپنی زندگی کے ہر لمحے کو بھرپور طریقے سے گزار رہے ہیں۔ تاہم، وہ یہ بھی تسلیم کرتے ہیں کہ یہ طرزِ زندگی ہر کسی کے لیے مناسب نہیں ہے اور کم نیند کا تجربہ کرنے والوں کو محتاط رہنا چاہیے۔