حنا خان نے چند برس قبل مداحوں کو یہ چونکا دینے والا انکشاف کیا تھا کہ انہیں اسٹیج تھری بریسٹ کینسر کا سامنا ہے۔ یہ خبر ان کے چاہنے والوں کے لیے نہایت تکلیف دہ تھی، تاہم حنا نے غیر معمولی حوصلے، عزم اور مثبت سوچ کے ساتھ اس بیماری کا سامنا کیا اور بالآخر اسے شکست دے دی۔
اس دوران، ان کے قریبی ساتھی اور دوست راکی جیسوال نے نہ صرف ان کا بھرپور ساتھ دیا بلکہ ہر مرحلے پر ان کی ہمت بندھائی، انہیں سنبھالا اور ایک سچے ساتھی کا کردار ادا کیا۔ راکی کی یہی محبت، وفاداری اور خلوص ہی وہ بنیاد بنے جس پر دونوں نے اپنی 13 سالہ رفاقت کو اب ازدواجی بندھن میں بدل دیا۔
.jpg)
سول میرج کی تقریب نہایت سادہ مگر جذبات سے بھرپور تھی۔ حنا خان نے شادی کے موقع پر مشہور ڈیزائنر منیش ملہوترا کا تیار کردہ ایک خصوصی لباس زیب تن کیا، جس پر ان کے اور راکی کے ناموں کی خوبصورت کڑھائی کی گئی تھی۔ دوسری طرف راکی جیسوال نے بھی روایتی اور نفیس انداز میں اپنی دلہن کا ساتھ دیا۔
.jpg)
حنا خان نے اپنی شادی کی خوبصورت تصاویر انسٹاگرام پر شیئر کیں، جنہیں دیکھ کر مداحوں کی جانب سے انہیں ڈھیروں دعائیں اور مبارکبادیں موصول ہوئیں۔ مداحوں نے نہ صرف انہیں ازدواجی زندگی کی نئی شروعات پر سراہا بلکہ کینسر جیسے خطرناک مرض کے خلاف ان کی جدوجہد، حوصلے اور جیت پر بھی خراجِ تحسین پیش کیا۔
.jpg)
حنا خان اور راکی جیسوال کی یہ کہانی لاکھوں لوگوں کے لیے امید، محبت اور عزم کا پیغام ہے کہ زندگی میں مشکلات کتنی ہی بڑی کیوں نہ ہوں، سچے جذبے اور قربانی کے ساتھ ہر طوفان کا مقابلہ کیا جا سکتا ہے۔
