سائرہ بانو نے اس حوالے سے باضابطہ اعلان کرتے ہوئے مداحوں سے ان کے ذاتی معاملات کا احترام کرنے کی اپیل کی ہے۔

 

 

سائرہ بانو کے وکیل وندنا شاہ کی جانب سے جاری کردہ بیان میں بتایا گیا کہ ازدواجی تعلقات میں مشکلات اور پیچیدگیوں کے باعث یہ فیصلہ کیا گیا۔ 

 

بیان میں کہا گیا کہ دونوں فریق ایک دوسرے کے لیے محبت اور عزت رکھتے ہیں، لیکن تعلقات میں تلخی اور فاصلے کے سبب ان کے درمیان وہ ہم آہنگی ختم ہو گئی جسے بحال کرنا ممکن نہیں رہا۔

 

 

سائرہ بانو نے عوام اور مداحوں سے اپیل کی کہ وہ اس مشکل وقت میں ان کے جذبات کا احترام کریں اور ان کی پرائیویسی کو یقینی بنائیں۔ انہوں نے کہا کہ یہ فیصلہ ان کے لیے آسان نہیں تھا، لیکن موجودہ حالات میں یہی بہتر راستہ ہے۔

 

 

اے آر رحمان نے علیحدگی کے اعلان پر سوشل میڈیا پر ایک جذباتی پیغام شیئر کیا۔ اپنے بیان میں انہوں نے لکھا کہ وہ شادی کے 30 سال مکمل کرنے کی امید رکھتے تھے، لیکن بعض اوقات زندگی کا اختتام ایسے انداز میں ہوتا ہے جس کا کوئی تصور نہیں کر سکتا۔ انہوں نے کہا، "ٹوٹے ہوئے دلوں کے بوجھ سے خدا کا تخت بھی کانپ سکتا ہے۔"

 

انہوں نے مزید کہا کہ وہ اس مشکل وقت سے گزرنے کی کوشش کر رہے ہیں، لیکن بکھرے ہوئے تعلقات کو دوبارہ جوڑنا ممکن نہیں۔ انہوں نے اپنے دوستوں اور مداحوں کا شکریہ ادا کیا جنہوں نے ان کے لیے نیک تمناؤں کا اظہار کیا اور ان کی پرائیویسی کا خیال رکھا۔

 

 

اے آر رحمان اور سائرہ بانو کی شادی 12 مارچ 1995 ءکو ہوئی تھی۔ یہ ارینج میرج تھی، جس کے بارے میں اے آر رحمان نے انٹرویو میں بتایا تھا کہ ان کی والدہ نے یہ رشتہ طے کیا تھا۔

 

 اس جوڑے کے تین بچے ہیں اور وہ اپنی ازدواجی زندگی کے 29 سال مکمل کرنے کے بعد علیحدگی کے راستے پر چل پڑے ہیں۔

 

یہ علیحدگی بھارتی شوبز انڈسٹری کے مداحوں کے لیے ایک حیرت انگیز خبر ہے، جو ان دونوں کے تعلقات کو ایک کامیاب مثال سمجھتے تھے۔