یہ ناقابل یقین اور حیران کن واقعہ بھارتی ریاست بہار کے ضلع ویسٹ چمپارن میں پیش آیا ہے، جہاں ایک سالہ بچے نے گھر کے صحن میں کھیلتے ہوئے ایک زہریلے کوبرا سانپ کو منہ سے کاٹ کر مار ڈالا جبکہ خوش قسمتی سے بچہ زندہ بچ گیا، اس کی حالت اب بہتر بتائی جا رہی ہے۔
بھارتی میڈیا رپورٹس کے مطابق ننھا گووندا اپنے گھر کے صحن میں کھیل رہا تھا کہ تقریباً دو فٹ لمبا کوبرا سانپ گھر میں داخل ہوا جسے اس نے کھلونا سمجھ کر اپنے منہ میں دبا لیا، جس کے بعد بچے نے سانپ کو اس زور سے کاٹا کہ سانپ موقع پر ہی مر گیا۔
رپورٹ میں بتایا گیا کہ بچے کی نانی نے جب یہ حیران کن منظر دیکھا تو وہ حواس باختہ رہ گئیں، لیکن اس وقت تک بچہ سانپ کو دو حصوں میں تقسیم کر چکا تھا، اس کے فوراً بعد گووندا بے ہوش ہوگیا۔
واقعہ کے بعد بچے کو فوری طور پر قریبی پرائمری ہیلتھ سنٹر منتقل کیا گیا جہاں ابتدائی طبی امداد کے بعد اُسے مزید علاج معالجہ کے لیے گورنمنٹ میڈیکل کالج ریفر کردیا گیا۔
ہسپتال ذرائع کے مطابق بچے کے جسم میں زہر کی کوئی علامات نظر نہیں آئیں تاہم وہ اب بھی مکمل طبی نگرانی میں ہے۔
بچے کی نانی کے مطابق واقعہ کے وقت بچے کی والدہ لکڑیاں چننے کے لیے گھر سے باہر گئی ہوئی تھیں۔
