وائٹ ہاؤس کی پریس سکریٹری کیرولین لیویٹ نے بتایا کہ امریکی صدر ڈونلڈ ٹرمپ کی ٹانگوں کی رگوں سے متعلق ایک عام سی بیماری کی تشخیص ہوئی ہے، حالیہ ہفتوں کے دوران صدر ٹرمپ نے اپنی ٹانگوں کے نچلے حصے میں ہلکی سی سوجن کو نوٹ کیا ہے۔

انہوں نے کہا کہ طبی ٹیسٹ سے صدر میں " کرونک وینس انسفیشنسی" (سی وی آئی) یعنی رگوں میں دائمی کمی کی تشخیص ہوئی ہے، جو 70 سال سے زیادہ عمر کے افراد میں ایک عام بات ہے۔" امریکی صدر کی عمر فی الوقت 79 سال ہے۔

کرونک وینس کی کمی اس وقت ہوتی ہے جب ٹانگوں کی رگیں خون کو دل تک واپس بھیجنے میں ناکام رہتی ہیں۔ حسب معمول رگوں کے والوز اس بات کو یقینی بناتے ہیں کہ خون آپ کے دل کی طرف بہتا ہے۔ لیکن جب یہ والوز اچھی طرح کام نہیں کرتیں، تو خون کا بہاؤ متاثر ہوتا ہے۔

یہ بھی پڑھیں: امریکی صدر ڈونلڈ ٹرمپ کا پاکستان کا دورہ متوقع

وائٹ ہاؤس نے اس بات کا انکشاف ایسی تصاویر پر قیاس آرائیوں کے درمیان کیا ہے، جن میں ٹرمپ کے ایک ہاتھ میں بعض معمولی چوٹیں اور ان کی سوجی ہوئی ٹانگوں کو دکھایا گیا۔ ترجمان نے دعویٰ کیا کہ ہاتھ پر زخم کے نشان بہت سارے لوگوں کے ساتھ مصافحہ کرنے اور اسپرین لینے کی وجہ سے پڑے ہیں۔ صدر ٹرمپ ہارٹ اٹیک اور فالج کے خطرے کو کم کرنے کے لیے اسپرین لیتے ہیں۔

لیویٹ نے کہا کہ لیبارٹری ٹیسٹنگ میں اس بات کا کوئی بھی ثبوت نہیں ملا کہ ٹرمپ کو "ڈیپ وین تھرومبوسس" یا "شریان کی بیماری" کا سامنا ہے۔ وائٹ ہاؤس کی طرف سے صدارتی معالج شان باربیلا کی طرف سے شائع ہونے والے ایک خط میں کہا گیا ہے کہ ٹرمپ کی "صحت بہترین ہے۔"

یاد رہے جانس ہاپکنز میڈیسن کی ویب سائٹ کے مطابق  کرونک وینس انسفیشنسی  (سی وی آئی) کی بیماری اس وقت ہوتی ہے جب "ٹانگوں کی رگیں خون کو آپ کے دل تک واپس جانے کی اجازت نہیں دیتی ہیں اور یہ صحت کے لیے کوئی سنگین خطرہ نہیں ہے۔" سی وی آئی ٹانگوں میں سیال جمع کرنے کا سبب بنتا ہے، جس سے سوجن ہو سکتی ہے۔

واضح رہے بائیڈن نے جنوری 2021 سے جنوری 2025 تک صدر کی حیثیت سے خدمات انجام دیں اور انہوں نے مئی میں اعلان کیا کہ انہیں پروسٹیٹ کینسر ہے۔ البتہ بائیڈن کے دفتر نے اس بات کی تردید کی ہے کہ 82 سالہ بائیڈن نے اپنے دور صدارت کے دوران کینسر کی تشخیص کو مخفی رکھا تھا۔