انڈین میڈیا کے مطابق پولیس حکام نے دعویٰ کیا کہ 17 جولائی کو پاکستان سے بھارت واپس آنے والی خاتون نغمہ نُور مقصود علی کی دستاویزات پر ان کا نام صنم خان رُخ لکھا ہے، تھین کی رہائشی اس خاتون سے پولیس تفتیش کر رہی ہے۔

بھارتی حکام کا خیال ہے کہ خاتون نے رواں برس ایک پاکستانی شخص سے ’آن لائن‘ شادی کے بعد پاکستان کا ویزا حاصل کرنے کے لیے جعلی دستاویزات استعمال کیں اور جعلی نام اور آدھار کارڈ کا استعمال بھی کیا۔

حکام کے مطابق 2021 میں نغمہ یا صنم کا پاکستان کے شہر ایبٹ آباد سے تعلق رکھنے والے بابر بشیر احمد کے ساتھ سوشل میڈیا ایپ ‘فیس بُک‘ کے ذریعے رابطہ ہوا، جلد ہی دونوں ایک دوسرے کی محبت میں گرفتار ہوگئے اور ٹیلی فون نمبروں کا تبادلہ بھی کیا۔

بھارتی خاتون نے پاکستان کے ویزے کے لیے بھی اپلائی کیا تاہم، اسے مسترد کردیا گیا۔ فروری 2024 میں خاتون نے بابر بشیر احمد کے ساتھ ’آن لائن‘ شادی کی اور پاکستانی ویزے کے لیے دوبارہ درخواست دے دی۔

حکام کا دعویٰ ہے کہ خاتون نے دستاویزات میں اپنا نام صنم لکھا اور وہ گذشتہ ہفتے 17 جولائی کو پاکستان سے واپس انڈیا آئی ہیں۔

دوسری جانب خاتون کی والدہ نے پولیس کے دعوے کو مسترد کرتے ہوئے کہا کہ 2015 میں میری بیٹی نے شوہر سے علیحدگی کے بعد اپنا اور اپنے بچوں کا نام تبدیل کرلیا تھا، پولیس نے خاتون کو نہ تو گرفتار کیا اور نہ ہی نظربند، البتہ تفتیش کا آغاز کردیا گیا ہے۔