کینیا میں بیوی سمیت 42 خواتین کا قاتل گرفتار
July, 16 2024
نیروبی:(ویب ڈیسک)کینیا کی پولیس کا کہنا ہے کہ انہوں نے خواتین کے بہیمانہ قتل کے شبے میں ایک شخص کو گرفتار کیا ہے جسے ’سیریل کلر‘ کہا جاتا ہے۔
اس سفاک ملزم نے تمام خواتین کو قتل کرکے کوڑے کے ڈھیر میں پھینک دیا تھا۔ پولیس کا کہنا ہے کہ ملزم کا نام کولنز جومیسی خلیسیا ہے اور اس کی عمر 33 سال ہے۔
ملزم نے اعتراف کیا ہے کہ 2022 ء سے اب تک اس نے اپنی بیوی سمیت 42 خواتین کو قتل کیا ہے۔
مشتبہ شخص پیر کی صبح ایک پب میں یورپی فٹ بال کا فائنل دیکھ رہا تھا، جب اسے گرفتار کیا گیا۔
گذشتہ جمعے کے بعد سے جب کینیا کے دارالحکومت نیروبی میں موکورو کان میںکٹی ہوئی لاشیں ملی ہیں، ملک میں صدمہ اور غم و غصہ ہے۔
کینیا کے فوجداری تحقیقات کے شعبے کے سربراہ محمد امین نے کہا کہ ملزم نے "2022 ء سے گذشتہ جمعرات کے درمیان 42 خواتین کو اغوا ، قتل کرنے اور کان میں پھینکنے کا اعتراف کیا ہے۔"
انہوں نے مزید کہا کہ گرفتاری کے بعد پولیس اہلکار ملزم کو جائے وقوعہ سے 100 میٹر دور اس کے گھر لے گئے۔
امین نے کہا کہ انہیں مشتبہ شخص کے گھر سے 10 موبائل فون، ایک لیپ ٹاپ، شناختی کارڈ اور خواتین کے کپڑے سمیت اہم شواہد ملے ہیں۔
پولیس نے کہا کہ انہیں "متاثرین کو ٹکڑے ٹکڑے کرنے" کے لیے استعمال ہونے والی چھڑی اور نو تھیلے ملے جن میں لاشوں کے ہونے کا امکان تھا۔
جمعہ کے بعد سے پولیس نے کچرے کے ڈھیر کو بند کر رکھا ہے جہاں لاشیں گلنے سڑنے کے مختلف مراحل میں ہیں اور کسی کو اندر جانے کی اجازت نہیں دے رہی ہے۔
پولیس کے مطابق مقتولین کی عمریں 18 سے 30 سال کے درمیان تھیں اور ان سب کو ایک ہی طریقے سے قتل کیا گیا تھا ۔
پولیس کے مطابق فرانزک پیتھالوجسٹ مقتولین کی لاشوں کا معائنہ کر رہا ہے اور قتل کے محرکات کا تعین کرنے کے لیے ملزم سے پوچھ گچھ کی جا رہی ہے۔
مقامی حکام نے خاندانوں پر زور دیا ہے - جو "یقین رکھتے ہیں کہ ان کے پیارے ان خوفناک قتل کا شکار ہوئے ہیں" - پولیس سے رابطہ کریں۔
حکام کا کہنا ہے کہ یہ واضح ہے کہ اب ہم ایک سیریل کلر، ایک سائیکو پیتھ، ایک ایسے قاتل کا سامنا کر رہے ہیں جس کے پاس انسانی جان کی کوئی عزت نہیں ہے ۔"
انہوں نے مزید کہا کہ ایک دوسرے شخص کو بھی متاثرین میں سے ایک کے فون کے ساتھ گرفتار کیا گیا ہے، جو اس وقت اس واقعے کے مرکزی مجرم کا ساتھی سمجھا جاتا ہے۔
کینیا کے ایک پولیس واچ ڈاگ گروپ نے پہلے کہا تھا کہ وہ اس بات کی تحقیقات کر رہا ہے کہ آیا پولیس ان جرائم میں ملوث تھی یا نہیں۔
گروپ نے دلیل دی کہ کچرے کا ڈھیر تھانے کے قریب ہے اور افسران کو دوسری جگہ منتقل کر دیا گیا ہے۔
