دنیا کے بہترین اور بدترین رہائشی شہروں کی فہرست جاری
June, 27 2024
لاہور :(ویب ڈیسک) رہائش کے لحاظ سے دنیا کے بہترین شہروں کی فہرست جاری کر دی گئی ہے، جس میں یورپی ملک آسٹریا کے دارالحکومت ویانا کو مسلسل تیسرے سال دنیا کا بہترین شہر قرار دیا گیا ہے۔
اکنامسٹ انٹیلی جنس یونٹ (EIU) نے 2024 کے لیے یہ فہرست جاری کی ہے۔
ویانا کو مستحکم انفراسٹرکچر، ثقافت، تعلیم، طبی سہولیات، اور تفریحی ذرائع کی بنا پر بہترین شہر قرار دیا گیا۔
ویانا کے بعد دوسرے نمبر پر ڈنمارک کا شہر کوپن ہیگن موجود ہے، جو پچھلے سال بھی اسی مقام پر تھا۔
تیسرے نمبر پر سوئٹزرلینڈ کا شہر زیورخ آیا جبکہ آسٹریلیا کا شہر میلبرن چوتھے نمبر پر رہا۔
کینیڈا کے شہر کیلگری اور سوئس شہر جنیوا مشترکہ طور پر پانچویں نمبر پر رہے جبکہ آسٹریلیا کا شہر سڈنی اور کینیڈین شہر وینکوور مشترکہ طور پر ساتویں نمبر پر موجود ہیں۔ ٹورنٹو نویں نمبر پر جبکہ جاپانی شہر اوساکا اور نیوزی لینڈ کا شہر آک لینڈ بھی نویں نمبر پر ہیں۔
اس فہرست میں پاکستان کا واحد شہر کراچی ہے، جو 173 شہروں کی فہرست میں 169 ویں نمبر پر ہے۔
پچھلے سال بھی کراچی کا یہی مقام تھا۔ رہائش کے لیے سب سے غیر موزوں شہروں کی فہرست میں شام کا شہر دمشق آخری (173 ویں) نمبر پر ہے، اس کے بعد لیبیا کا شہر تریپولی (172)، الجزائر (171) اور نائیجیریا کا شہر لاگوس (170) شامل ہیں جبکہ بنگلادیش کا شہر ڈھاکہ 168 ویں نمبر پر موجود ہے۔
رپورٹ میں بتایا گیا کہ عالمی سطح پر گذشتہ برس کے دوران حالات میں کچھ بہتری آئی مگر عالمی استحکام کو لاحق خطرات برقرار ہیں۔
شرح سود اور مہنگائی میں اضافے کے ساتھ ساتھ دیگر اقتصادی مسائل کی وجہ سے دنیا کے مختلف حصوں میں احتجاجی مظاہرے جاری رہے۔
اس رپورٹ کے مطابق رہائش کے لحاظ سے دنیا کے بہترین اور بدترین شہروں کی درجہ بندی کرتے ہوئے کئی عوامل کو مدنظر رکھا گیا، جن میں صحت، تعلیم، ثقافت، ماحول، انفراسٹرکچر، اور استحکام شامل ہیں۔
ویانا کی مسلسل برتری اور کراچی کا نچلی سطح پر ہونا پاکستان کے شہریوں کے لیے ایک لمحہ فکریہ ہے۔
