اس منصوبے کے تحت ڈی جی پی آر (ڈائریکٹوریٹ جنرل پبلک ریلیشنز) کو آرٹیفیشل انٹیلیجنس (اے آئی) ٹیکنالوجی سے لیس کیا جائے گا تاکہ سوشل میڈیا کی مانیٹرنگ کو مؤثر اور جامع بنایا جا سکے۔

 

 

منصوبے کے تحت ڈی جی پی آر میں ایک سنٹرل سوشل میڈیا مانیٹرنگ روم قائم کیا جائے گا، جو اے آئی ٹیکنالوجی سے لیس ہوگا۔ اس کے علاوہ ڈویژنل سطح پر انفارمیشن دفاتر کا قیام بھی عمل میں لایا جائے گا تاکہ مانیٹرنگ کا نظام مزید مضبوط اور مربوط بنایا جا سکے۔

 

 

سیکریٹری اطلاعات و نشریات کا کہنا ہے کہ آرٹیفیشل انٹیلیجنس سے لیس یہ جدید نظام نہ صرف حکومت کی نگرانی کو مزید مؤثر بنائے گا بلکہ ورک لوڈ کو بھی کم کرے گا۔ ان کا کہنا تھا کہ یہ منصوبہ معلومات کی دستیابی اور ڈیجیٹل فورمز پر منتقلی کے عمل کو آسان بنائے گا، جو ماضی کے مینول سسٹم کے مقابلے میں زیادہ قابل اعتماد ہوگا۔

 

 

سیکرٹری اطلاعات و نشریات نے مزید وضاحت کی کہ اس منصوبے کے تحت 20 سال پرانی معلومات بھی ڈیجیٹل طور پر دستیاب ہوں گی۔ انہوں نے کہا کہ سالوں بعد بھی اگر کسی معلومات کی ضرورت ہوگی تو وہ ون کلک پر دستیاب ہوگی، جو کہ موجودہ مینول ریکارڈ کیپنگ کے نظام کے مقابلے میں ایک بڑی سہولت ہے۔

 

 

پہلے مینول ریکارڈ کیپنگ اور فائل سسٹم کے ذریعے معلومات محفوظ کی جاتی تھیں، جو وقت اور وسائل کی زیادہ کھپت کا باعث بنتی تھیں۔ 

 

اب اس جدید منصوبے سے حکومتی کاموں میں شفافیت، تیزی اور مؤثریت آئے گی، جو ڈیجیٹل دور کے تقاضوں کے عین مطابق ہے۔

 

یہ اقدام حکومت پنجاب کی جانب سے ڈیجیٹل ٹیکنالوجی کے استعمال میں ایک اہم سنگ میل ہے، جو سوشل میڈیا کے ذریعے معلوماتی نظام کو مؤثر بنانے میں مددگار ثابت ہوگا۔