ہواوے کا پاکستانی نوجوانوں کیلئےپروگرام کا آغاز
October, 18 2024
لاہور:(ویب ڈیسک)ہواوے نے پاکستان میں نوجوانوں کو جدید معلوماتی اور مواصلاتی ٹیکنالوجی (ICT) کی مہارتوں سے آراستہ کرنے کے لیے ایک بڑے تربیتی پروگرام کا آغاز کیا ہے۔
اس اقدام کے تحت تین لاکھ نوجوانوں کو جدید تکنیکی تربیت دی جائے گی، جس سے پاکستان میں ٹیکنالوجی کے میدان میں مہارت کا معیار بلند ہوگا۔
یہ پروگرام پاکستان کی قومی ووکیشنل اینڈ ٹیکنیکل ٹریننگ کمیشن (NAVTTC) کے ساتھ مل کر تیار کیا گیا ہے اور اس کا مقصد نوجوانوں کو عالمی سطح پر مطلوبہ ہنر فراہم کرنا ہے۔
یہ تربیتی پروگرام پاکستان کے وزیرِ اعظم شہباز شریف کے حالیہ دورۂ چین کے دوران ہواوے کے ساتھ طے پانے والے معاہدے کا حصہ ہے۔
اس معاہدے کا بنیادی مقصد پاکستان کے تعلیمی اور تکنیکی نظام کو بہتر بنانا اور مقامی طلبہ کو ایسی مہارتوں سے آراستہ کرنا ہے، جو انہیں عالمی مارکیٹ میں بہتر روزگار کے مواقع فراہم کر سکیں۔
ہواوے کا یہ اقدام نوجوانوں کے لیے روزگار کے مواقع پیدا کرنے میں اہم کردار ادا کرے گا اور ان کی اقتصادی حالت میں بہتری لانے کا سبب بنے گا۔
اس پروگرام کے تحت عالمی معیار کی تکنیکی تعلیم اور جدید تربیتی مواد فراہم کیا جائے گا، جو ملک میں تکنیکی جدت اور ترقی کے فروغ کے لیے ایک اہم سنگِ میل ثابت ہوگا۔
یہ تربیتی پروگرام نا صرف پاکستان کے تعلیمی نظام کو جدید خطوط پر استوار کرنے کا عزم رکھتا ہے بلکہ ملک کی معیشت کو مستحکم کرنے اور نوجوانوں کو تکنیکی ماہرین کے طور پر تیار کرنے کی راہ بھی ہموار کرے گا۔
