میڈیا رپورٹس کے مطابق سابق وفاقی وزیر حماد اظہر کے والد کے انتقال پر خالی ہونے والی قومی اسمبلی کی نشست این اے 129 پر تحریک انصاف کی جانب سے حماد اظہر کو میدان میں اتارنے کا فیصلہ کیا گیا ہے تاہم ساتھ ہی یہ خبریں بھی زیر گردش تھیں کہ حماد اظہر کو ن لیگ کی جانب سے ٹکٹ مل سکتی ہے۔
سابق وفاقی وزیر نے ن لیگ کے ٹکٹ پر الیکشن میں حصہ لینے کی افواہوں کو مسترد کرتے ہوئے سماجی رابطوں کی ویب سائٹ ایکس پر ایک ٹویٹ بانی پی ٹی آئی عمران خان اور اپنے والد کے ہمراہ ایک تصویر شیئر کی ۔
پوسٹ کے کیپشن میں انہوں نے لکھا کہ دو درویش طبیعت افراد سے میں نے بہت کچھ سیکھا اور ان کی شفقت کے زیر سایہ رہا، ایک میرے والد اور دوسرے عمران خان، والد اللہ کو پیارے ہو گئے اور خان صاحب دو سال سے جیل میں ہیں، کاش آج میں خان صاحب سے مل سکتا اور ان کے گلے لگ کر اپنا دکھ کم کر سکتا۔
دو درویش تبعیت افراد سے میں نے بہت کچھ سیکھا اور ان کی شفقت کے زیر سایہ رہا۔ ایک میرے والد اور دوسرا عمران خان۔ والد اللہ کو پیارے ہو گئے اور خان صاحب دو سال سے ناحق جیل میں ہیں۔ کاش آج میں خان صاحب سے مل سکتا اور ان کے گلے لگ کر اپنا دکھ کم کر سکتا۔ pic.twitter.com/UZUgdyGTk9
— Hammad Azhar (@Hammad_Azhar) July 27, 2025
دوسری جانب پی ٹی آئی کے وکیل ابوذرسلمان نیازی نے ایک بیان میں کہا کہ حماد اظہر کے کسی اور جماعت جیسے کہ مسلم لیگ( ن) میں شامل ہونے کی خبریں مکمل طور پر جھوٹی اور محض پروپیگنڈا ہیں۔
ابوذر سلمان نیازی نے مزید کہا کہ میں حماد اظہر کے ساتھ موجود ہوں اور وہ خود کہہ رہے ہیں کہ ’’اپنی آخری سانس تک عمران خان کے ساتھ ہوں‘‘، پی ٹی آئی وکیل اس پیغام کو حماد اظہر نے بھی ری ٹویٹ کرتے ہوئے اس کی تائید کی ۔
