تفصیلات کے مطابق پنجاب بھر میں مون سون بارشوں کا پانچواں سلسلہ 28 جولائی تا 31 جولائی تک جاری رہنے کی پیشگوئی کی گئی ہے۔ صوبے کے مختلف اضلاع میں شدید بارشوں کا امکان ہے جس کے نتیجے میں متعلقہ اداروں کو الرٹ جاری کر دیا گیا ہے۔

ترجمان پی ڈی ایم اے کے مطابق بارشوں کی زد میں آنے والے اضلاع میں مری، گلیات، اٹک، چکوال، جہلم، منڈی بہاوالدین، گجرات، گوجرانوالہ، حافظ آباد، لاہور، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، خوشاب، سرگودھا، میانوالی، ننکانہ صاحب، فیصل آباد اور اوکاڑہ شامل ہیں تاہم 29 تا 31 جولائی کے دوران ڈیرہ غازی خان، بھکر، بہاولپور، خانیوال، پاکپتن، وہاڑی، مظفرگڑھ اور راجن پور میں بھی بارشوں متوقع ہے۔

یہ بھی پڑھیں: لینڈ سلائیڈنگ، فیری میڈوز ٹریک بند، بیسیوں سیاح پھنس گئے

ریلیف کمشنر پنجاب نبیل جاوید نے صوبے بھر کے کمشنرز اور ڈپٹی کمشنرز کو ہدایت جاری کی کہ وہ ہمہ وقت تیار رہیں، عملہ الرٹ رکھا جائے جبکہ ریسکیو 1122 کی ڈیزاسٹر رسپانس ٹیمیں بھی ہائی الرٹ پر رہیں، رواں سال مون سون بارشوں کی شدت پچھلے سال سے زائد ہے اور اب تک 73 فیصد زیادہ بارشیں ریکارڈ کی جا چکی ہیں۔

ڈائریکٹر جنرل پی ڈی ایم اے نے لوگوں کو ہدایت کی ہے کہ وہ احتیاطی تدابیر پر عمل کریں، مسافروں اور سیاحوں سے اپیل کی گئی ہے کہ وہ غیر ضروری سفر سے اجتناب کریں اور حتاط رہے۔ شہریوں کو ہدایت کی گئی ہے کہ اربن و فلیش فلڈنگ کی صورت میں محفوظ مقامات پر منتقل ہو جائیں اور کسی صورت بھی گاڑی بہتے پانی سے نہ گزاریں۔ ایمرجنسی کی صورت میں ہیلپ لائن 1129 پر فوری رابطہ کیا جا سکتا ہے۔