پی ڈی ایم اے ترجمان کے مطابق 28 سے 31 جولائی کے دوران پنجاب کے بیشتر اضلاع میں مون سون بارشوں کی پیشگوئی ہے ، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ اور حافظ آباد میں بارش متوقع ہے۔

ترجمان نے بتایا کہ صوبائی دارالحکومت لاہور ، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، خوشاب، سرگودھا، میانوالی، ننکانہ صاحب، چنیوٹ، فیصل آباد، اور اوکاڑہ میں بارش کا امکان ہے۔

پی ڈی ایم اے کے مطابق 29 تا 31 جولائی ڈیرہ غازی خان، بھکر، بہاولپور، خانیوال، پاکپتن، وہاڑی، لودھراں، مظفرگڑھ اور راجن پور میں بادل برسیں گے جبکہ لاہور ،راولپنڈی، گوجرانوالہ اور فیصل آباد میں اربن فلڈنگ کا خدشہ ہے۔

ڈی جی پی ڈی ایم اے عرفان علی کاٹھیا نے صوبہ بھر کے کمشنرز و ڈپٹی کمشنرز کو الرٹ رہنے اور پنجاب کی سول ڈیفنس، ریسکیو و متعلقہ اداروں کو پیشگی انتظامات مکمل کرنے کی ہدایت کردی۔

یہ بھی پڑھیں: مون سون بارشوں کا قہر جاری، جاں بحق افراد کی تعداد سامنے آگئی

عرفان علی کاٹھیا کا کہنا تھا کہ وزیر اعلیٰ پنجاب مریم نواز کی ہدایات کے پیش نظر متعلقہ محکموں کو الرٹ جاری کر دیا ہے ، ایمرجنسی کنٹرول رومز میں سٹاف کو الرٹ رکھا جائے، ریسکیو 1122 کی ڈیزاسٹر رسپانس ٹیموں کو بھی ہائی الرٹ رکھا جائے۔

ڈی جی پی ڈی ایم اے نے کہا کہ شدید بارشوں کے باعث مری و گلیات میں لینڈ سلائیڈنگ کا خطرہ ہے ، بارشوں کے باعث کچے مکانات اور مخدوش عمارتوں کو نقصان کا خدشہ ہے ، عوام جاری کردہ احتیاطی تدابیر پر عمل کریں۔

ان کا مزید کہنا تھا کہ مسافر اور سیاح موسمی صورتحال کے پیش نظر محتاط رہیں اور غیر ضروری سفر سے گریز کریں ، اربن و فلیش فلڈنگ کی صورت میں محفوظ مقامات پر رہیں ، گاڑی ہرگز بہتے ہوئے پانی سے کراس نہ کریں۔