سینیٹر اعظم خان نے سواتی نے گھر کی فروخت کے معاملات پر شہباز گل کے الزامات کی تردید کرتے ہوئے ایک ویڈیو پیغام میں کہا کہ میر ے اس ویڈیو پیغام کا مقصد میرے ایبٹ آباد کے گھر سے متعلق شہباز گل کے جھوٹے الزامات اور من گھڑت بیانات کی تردید اور حقائق سے ہے ۔

ان کا کہنا تھا کہ شہباز گل جان بوجھ کر من گھڑت الزامات عائد کر کے لوگوں کو بلیک میل کرتے ہیں، آج میں مکان بیچنے کے حقائق بتاتا ہوں، میرا یہ گھر ایبٹ آباد میں واقعہ ہے ، جو اپنی خوبصورتی اور تعلیمی اداروں کی وجہ سے پاکستان کا ہارورڈ کہلاتاہے ۔

انہوں نے کہا کہ حبیب اللہ کالونی اور کاکول اکیڈمی ایک دوسرے کے ساتھ منسلک ہیں، ان کے درمیان ایک اونچی دیوار ہے جو ان دونوں کو الگ کرتی ہے ، ایبٹ آباد میں دو پوش ہاؤسنگ سوسائٹیز ہیں جو 80 کی دہائی میں بنائی گئیں جن میں جناح کالونی اور دوسری حبیب اللہ کالونی ہے ۔

اعظم سواتی کا کہنا تھا کہ میرا گھر 210 مرلے پر محیط ہے ، ڈیڑھ سال قبل حبیب اللہ کالونی کی مرکزی شاہراہ پر ایک مرلہ کی قیمت 25 سے 30 لاکھ روپے تھی ، اب 30 لاکھ کو 210 سے ضرب دیں تو نتیجہ آپ کے سامنے آجائے گا ۔

پی ٹی آئی رہنما نے کہا کہ میرا تین منزلہ مکان ہے ، پورے گھر میں ماربل لگاہواہے، شہباز گل صاحب 4،5 سو ڈالر خرچ کریں اور اپنے کسی آدمی کو وہاں بھیجیں اور تحقیق کروا لیں، اگر آپ نہیں کریں گے تو میں مقامی شرفاء و لوکل باڈیز کے لوگوں سے ویڈیوز بنواؤں گا حلفاً بتائیں ڈیڑھ سال قبل خالی زمین کی قیمت کیا تھی ۔

یہ بھی پڑھیں: عمران خان کے دستخط شدہ بیٹ کی نیلامی کیلئے 10 کروڑ کی پیشکش

اعظم سواتی کا کہنا تھا کہ یاد رکھیں آپ نے غلط آدمی کو للکارا ہے، پھر میں تمہیں کہتا ہوں آپ کو معافی معانگنا پڑے گی ، میں نے کتنی وزارتوں کی سربراہی کی ہے ، میرے "چپڑاسی بھائی "باہر سے بیٹھ کر نہیں بلکہ ادھر آکر میری ایمانداری کی باتیں پوچھو۔

انہوں نے شہباز گل کو مخاطب کرتے ہوئے کہا کہ نعیم الحق کی وفات کے بعد عمران خان نے تمہیں جو عہدہ دیا تم اس کے قابل نہیں تھے ، لیکن تم آستین کے سانپ نکلے ، کہاوت ہے کہ گھر کا بھیدی لنکا ڈھائے ، تم وہ پہلے مجرم ہو جس نے عمران خان کا بھیدی ہونے کی حیثیت سے اسے دھوکہ دیا ۔

ان کا کہنا تھا کہ تم جیل میں رہے ، پمز میں رہے یا سی آئی اے کے لاک اپ میں رہے، ڈر اور خوف کے تمھارے کرتوت زبان زدعام ہیں ، گل صاحب آج آپ پارٹی کے جن لوگوں پر جھوٹے الزامات لگا کر تنقید کر رہے ہیں، خدا جانے کس کے ایجنڈے کی تکمیل ہو رہی ہے ۔

اعظم سواتی نے کہا کہ آپ اپنی چرب زبانی سے پاکستان کو نقصان پہنچا رہے ہو، بڑے شرم کی بات ہے امریکا میں لوگوں سے عمران خان کی والہانہ محبت کے طفیل قربت حاصل کرتے ہو، مجھے شرم محسوس ہوتی ہے تم نے عمران خان کے اعتماد کو سب سے پہلے ٹھیس پہنچائی، تم نے میرے لیڈر کو دھوکہ دیاہے ۔

اعظم سواتی نے شہباز گل کو چیلنج دیتے ہوئے کہا کہ میں تمہیں دعوت دیتاہوں پاکستان کو تباہی کے دہانے پر پہنچانے کی بجائے ادھر واپس آؤ، ہمارے ساتھ اس تحریک میں شامل ہو، جو میرے لیڈر عمران خان کی رہائی کی تحریک ہے ، اگر ڈر خوف اور بزدلی تمہاری زندگی کا حصہ نہیں ہے تو میرے چیلنج کو قبول کرو۔

انہوں نے مزید کہا کہ پاکستان کو تباہ کرنے کی کوشش کرنا چھوڑ دو میں منتظر رہوں گا کب تم گھر کی صحیح فروخت کی تحقیق مکمل کرتے ہو، اگر تم نے غلطی کی ہے تو شرمندہ ہونے کی ضرورت نہیں ، معافی کا آپشن کھلا ہے۔