پنجاب اور کے پی میں 24 گھنٹوں کے دوران موسلادھار بارشوں کی پیشگوئی
 محکمہ موسمیات نے پنجاب اور خیبر پختونخوا میں آئندہ 12 سے 24 گھنٹوں کے دوران تیز ہواؤں کے ساتھ موسلادھار بارشوں کی پیشگوئی کردی ۔
فائل فوٹو
اسلام آباد: (سنو نیوز) محکمہ موسمیات نے پنجاب اور خیبر پختونخوا میں آئندہ 12 سے 24 گھنٹوں کے دوران تیز ہواؤں کے ساتھ موسلادھار بارشوں کی پیشگوئی کردی۔

موسم کا احوال بتانے والوں کے مطابق آئندہ 24 گھنٹوں کے دوران خیبر پختونخوا کے مختلف علاقوں بشمول چترال، دیر، سوات، کالام، مانسہرہ، بٹگرام، ایبٹ آباد، ہری پور، صوابی، مردان، پشاور، چارسدہ، کوہاٹ، ہنگو اور گردونواح کے علاقوں میں تیز ہواؤں کے ساتھ موسلادھار بارش کا امکان ہے۔

محکمہ موسمیات کی جانب سے بتایا گیا ہے کہ اسلام آباد سمیت پنجاب کے مختلف اضلاع بشمول، راولپنڈی، جہلم، چکوال، تلہ گنگ، منڈی بہاؤالدین، گجرات، گوجرانوالہ، نارووال، حافظ آباد، چنیوٹ میں بھی بادل برسیں گے۔

اسی طرح صوبائی دارالحکومت لاہور سمیت سیالکوٹ، سرگودھا، فیصل آباد، قصور، اوکاڑہ، ساہیوال، پاکپتن اور گردونواح میں بھی آئندہ 24 گھنٹوں کے دوران وقفے وقفے سے موسلادھار بارش متوقع ہے۔

یہ بھی پڑھیں: مون سون بارشوں کا قہر جاری، جاں بحق افراد کی تعداد سامنے آگئی

این ڈی ایم اے کی جانب سے ممکنہ موسمی صورتحال کے دوران درختوں کے گرنے، بجلی کی بندش، کمزور تعمیرات کو نقصان، حد نگاہ کم ہونےکے باعث ٹریفک حادثات کا خدشہ ظاہر کیا گیا ہے۔

نیشنل ڈیزاسٹرمینجمنٹ اتھارٹی نے شہریوں کو ہدایت کی ہے کہ بارش کے دوران درختوں، بل بورڈز اور غیر محفوظ تعمیرات سے دور رہیں، گاڑیوں کو محفوظ جگہوں پر پارک کریں، بارش کے دوران غیر ضروری سفر سے گریز کریں۔