قائم مقام سپیکر ظہیر اقبال چنڑ کی زیر صدارت پنجاب اسمبلی کا اجلاس ہوا، دوران اجلاس وزیر خزانہ مجتبیٰ شجاع الرحمان نے اظہار خیال کرتے ہوئے کہا کہ وزیر اعلیٰ کی بھی خواہش ہے اور آپ سے درخواست ہے کہ جو نمائندگان منتخب ہوکر اسمبلی میں آئے انہیں ایوان میں آنے کی اجازت دی جائے تاکہ حلقوں کی نمائندگی کریں۔

مجتبیٰ شجاع الرحمان کا کہنا تھا کہ اسمبلی میں اپوزیشن کے بغیر رونق نہیں ہے، معطل چھبیس ارکان کی بحالی کی جائے تاکہ وہ اپنے حلقوں کی نمائندگی آزادانہ کرسکیں۔

قائم مقام سپیکر پنجاب اسمبلی ظہیر اقبال چنڑ نے کہا کہ اپوزیشن کے بغیر مجھے بھی مزہ نہیں آرہا، اپوزیشن اراکین کی بحالی پر اچھا پیغام جائے گا فوری طورپر چھبیس ارکان کو بحال کرنے کا حکم دیتا ہوں۔

یہ بھی پڑھیں: نو مئی مقدمات، اپوزیشن لیڈر پنجاب اسمبلی احمد خان بھچر کو 10 سال قید کی سزا

انہوں نے مزید کہا کہ معطل ارکان کی بحالی کا فوری نوٹیفکیشن جاری کیا جائے، اپوزیشن کے ارکان چاہیں تو ابھی اجلاس میں شریک ہوسکتے ہیں۔

بعدازاں قائم مقام سپیکر ظہیر اقبال چنڑ کی ہدایت پر اپوزیشن کے 26 معطل اراکین کی بحالی کا نوٹیفکیشن جاری کردیا گیا۔

یاد رہے کہ اپوزیشن اراکین کو 27 جون کو وزیر اعلیٰ مریم نواز کی تقریر کے دوران ہلڑ بازی پر معطل کیا گیا تھا، سپیکر ملک احمد خان نے اسمبلی قوانین 210 کے تحت اراکین کو معطل کیا تھا۔

واضح رہے کہ معطل کیے جانے والے اراکین نے بجٹ کی کاپیاں پھاڑ کر صوبائی وزرا کی جانب اچھال دی تھیں۔