خیبر پختونخوا اسمبلی میں سینیٹ کی 11 نشستوں کے لیے ووٹنگ ہوئی اور اسمبلی کے تمام 145 اراکین نے حق رائے دہی استعمال کیا۔

غیر حتمی و غیر سرکاری نتیجے کے مطابق سینیٹ کی 7 جنرل نشستوں میں سے 4 نشستوں پر پی ٹی آئی کامیاب قرار پائی، پاکستان تحریک انصاف کے مرادسعید، فیصل جاوید، مرزا آفریدی اور نورالحق قادری جنرل نشستوں پر سینیٹر منتخب ہو گئے۔

غیرسرکاری نتیجے کے تحت جنرل نشستوں پراپوزیشن جماعتیں 3 سیٹوں پر کامیاب ہوئیں، ن لیگ کے نیاز احمد، پیپلزپارٹی کے طلحہ محمود اور جےیوآئی کے عطاء الحق جنرل نشستوں پر سینیٹر منتخب ہوئے۔

یہ بھی پڑھیں: پنجاب اسمبلی، سینیٹ کی خالی نشست پر پولنگ، ن لیگ نے میدان مارلیا

غیر حتمی غیر سرکاری نتائج کے مطابق تحریک انصاف کے امیدوار مراد سعید جنرل نشست پر 26 ووٹوں کے ساتھ فاتح قرار پائے جبکہ فیصل جاوید کو 22 ، نورالحق قادری کو اور مرزا آفریدی کو 21 ووٹ ملے۔

خواتین کی 2 نشستوں میں سے ایک پر تحریک انصاف کی روبینہ ناز اور دوسری پر پیپلزپارٹی کی روبینہ خالد کامیاب ہوئیں، خواتین کی نشست پر پی ٹی آئی کی امیدوار روبینہ ناز کو 89 ووٹ ملے ۔

ٹیکنوکریٹس کی نشستوں میں سے ایک پر پی ٹی آئی کے اعظم سواتی اور دوسری پر جےیو آئی کے دلاورخان نے کامیابی سمیٹی جبکہ پی ٹی آئی کے ناراض امیدوار خرم ذیشان کوئی ووٹ نہ لے سکے۔

خیال رہے کہ پی ٹی آئی اور اپوزیشن کے درمیان 6 اور 5 کا فارمولہ طے پایا تھا اور اسی تناسب سے دونوں نے نشستیں جیتیں۔