محکمہ داخلہ پنجاب نے صوبہ بھر میں دفعہ 144 کے نفاذ سے متعلق نوٹیفکیشن جاری کردیا۔

نوٹیفکیشن کے مطابق پنجاب بھر میں ڈیموں، دریاؤں، نہروں، تالابوں اور جھیلوں میں ہر قسم کی تیراکی پر پابندی عائد کردی گئی،گلیوں، سڑکوں، کھلی جگہوں یا عوامی مقامات پر بارش کے جمع شدہ پانی میں نہانے پر دفعہ 144 نافذ کی گئی ہے۔

محکمہ داخلہ پنجاب کی جانب سے جاری نوٹیفکیشن میں کہا گیا ہے کہ صوبہ بھر میں ڈیموں، دریاؤں، نہروں، تالابوں، جھیلوں اور ڈسٹری بیوٹریز میں بلااجازت کشتی رانی پر پابندی عائد رہے گی، دفعہ 144 کے تحت تمام پابندیوں کا اطلاق 30 اگست تک ہوگا۔

یہ بھی پڑھیں: جڑواں شہروں میں سیلاب کا خدشہ، ہائی الرٹ، تعطیل کا اعلان

نوٹیفکیشن میں بتایا گیا ہے کہ پابندی موجودہ موسمی حالات کے تناظر میں قیمتی انسانی جانوں کی حفاظت کیلئے لگائی گئی ہے، مون سون میں شدید بارشوں کے دوران نشیبی علاقوں، گلیوں اور کھلی جگہوں پر بارش کے پانی کے جمع ہونے میں خاطر خواہ اضافہ ہوا۔

شدید بارشوں کے دوران بارشی پانی میں نہانے سے بچوں اور نوجوان کو شدید خطرات لاحق ہو سکتے ہیں، پنجاب بھر کے ڈیموں، دریاؤں، نہروں، تالابوں اور جھیلوں میں ان دنوں پانی کی سطح بلند ہے، ایسی صورتحال میں تیراکی اور کشتی رانی انسانی زندگی کیلئے انتہائی خطرناک ہے۔

محکمہ داخلہ پنجاب کی جانب سے ہدایت کی گئی ہے کہ انتظامیہ اور قانون نافذ کرنے والے ادارے حکم نامے پر عملدرآمد یقینی بنائیں۔