ذرائع کے مطابق بانی پی ٹی آئی کی بہن علیمہ خان کو نیشنل سائبر کرائم انویسٹی گیشن ایجنسی لاہور زون کی جانب سے نوٹس جاری کیا گیا ہے جس میں انہیں 17 جولائی صبح 11 بج کر 30 منٹ پر نیشنل سائبر کرائم انویسٹی گیشن ایجنسی کے دفتر گلبرگ II لاہور میں ذاتی طور پر پیش ہونے کی ہدایت کی گئی ہے۔

نوٹس میں کہا گیا ہے کہ علیمہ خان کی طلبی کا مقصد ان سے ان کے دفاع میں بیان ریکارڈ کرنا ہے، یہ کارروائی انکوائری نمبر 2531/25 مورخہ 27 مئی 2025 کے تحت عمل میں لائی جا رہی ہے۔

ذرائع کا بتانا ہے کہ علیمہ خان پر الزام ہے کہ وہ سوشل میڈیا کے ذریعے ریاست مخالف سرگرمیوں میں ملوث رہی ہیں۔

یہ بھی پڑھیں: عمران خان کے بیٹے پاکستان کب آ رہے ہیں؟ علیمہ خان نے بتا دیا

نوٹس میں خبردار کیا گیا ہے کہ اگر ملزمہ پیش نہ ہوئیں تو یہ تصور کیا جائے گا کہ ان کے پاس اپنے دفاع میں کچھ پیش کرنے کو نہیں ہے، عدم حاضری کی صورت میں قانونی کارروائی کو آگے بڑھایا جائے گا۔

نیشنل سائبر کرائم انویسٹی گیشن ایجنسی کی جانب سے جاری نوٹس میں مزید کہا گیا ہے کہ طلبی پر عمل نہ کرنے کی صورت میں علیمہ خان کیخلاف دفعہ 174 کے تحت قانونی کارروائی کی جا سکتی ہے۔

واضح رہے کہ نیشنل سائبر کرائم انویسٹی گیشن ایجنسی وزارت داخلہ کے ماتحت ادارہ ہے۔