ذرائع کے مطابق کوہستان سکینڈل میں لگژری گاڑیوں اور جائیدادوں کی تفصیلات، تصاویر اور ویڈیوز منظر عام پر آئی ہیں جس کے بعد نیب پشاور نے خیبر پختونخوا کی تاریخ کے میگا کوہستان کرپشن سکینڈل کیس کو انکوائری سے باضابطہ تفتیش میں تبدیل کر دیا ہے۔
سرکاری تفصیلات کے مطابق نیب نے اس کیس میں اب تک مجموعی طور پر 25 ارب روپے مالیت کے اثاثے برآمد اور ضبط کئے ہیں، نیب کی جانب سے ایک ارب روپے سے زائد نقد رقم، غیر ملکی کرنسی اور تین کلو گرام سے زیادہ سونا بھی برآمد کیا گیا ہے۔
نیب کی جانب سے اس کیس سے جڑے مختلف کمرشل بینکوں میں موجود 73 بینک اکاؤنٹس کو بھی منجمد کر دیا گیا ہےجن میں 5 ارب روپے سے زیادہ رقم موجود ہے۔
قومی احتساب بیورو نے 77 لگژری گاڑیاں بھی ضبط کی ہیں، جبکہ 109 جائیدادیں بھی مختلف شہروں بشمول اسلام آباد، راولپنڈی، پشاور، ایبٹ آباد اور مانسہرہ سے قبضے میں لی گئی ہیں، ان میں 4 فارم ہاؤسز، 12 کمرشل پلازے، 2 کمرشل پلاٹس، 30 مکانات، 12 دکانیں اور فوڈ کورٹس، 25 فلیٹس ، پینٹ ہاؤسزاور 175 کنال زرعی اراضی شامل ہے جن کی مجموعی مالیت کا تخمینہ تقریباً 17 ارب روپے لگایا گیا ہے۔
یہ بھی پڑھیں: پی ٹی آئی رہنما ڈاکٹر یاسمین راشد کی طبیعت ناساز، ہسپتال منتقل
سرکاری ذرائع کا بتانا ہے کہ آئندہ 24 سے 48 گھنٹوں کے دوران اس کیس میں اہم شخصیات کی گرفتاری بھی متوقع ہے جس کیلئے تیاریاں جاری ہیں۔
نیب ذرائع کے مطابق یہ بہت بڑا فراڈ انتہائی چالاکی سے اور واضح گٹھ جوڑ کے ساتھ رچایا گیا، جس میں سرکاری اہلکار، لالچی ٹھیکیدار، ملی بھگت کرنے والے بینک حکام اور دیگر شخصیات شامل تھیں۔
ذرائع کا کہنا ہے کہ اس سکینڈل میں ملوث تمام ملزمان نے حیران کن دیدہ دلیری سے کام لیا، جس کے نتیجے میں اربوں روپے کی رقم چپ چاپ قومی خزانے سے نکال لی گئی اور کسی مالیاتی نگرانی کے ادارے کو بھنک تک نہ پڑی۔
نیب نے کوہستان سکینڈل میں ملوث کنٹریکٹر محمد ایوب کو گرفتار کر لیا ہے، ملزم کے اکاؤنٹ میں تین ارب روپے ٹرانسفر ہوئے تھے جبکہ ملزم نے کرپشن کی رقم سے اعظم سواتی کا گھر بھی خریدا تھا۔
یاد رہے کہ اس کیس میں نیب خیبر پختونخوا نے اعظم سواتی کے جواب پر عدم اطمینان کا اظہار کیا ہے اور پی ٹی آئی رہنما کو نوٹس جاری کرتے ہوئے 17جولائی کو طلب کر رکھا ہے، نیب کی جانب سے وزیر اعلیٰ کے معاون خصوصی امجد علی کو بھی نوٹس کیا گیا ہے جس میں ان سے اثاثہ جات کی تفصیلات طلب کی گئی ہیں۔
