وزیراعلیٰ پنجاب مریم نواز کی زیر صدارت خصوصی اجلاس ہوا جس میں صوبائی وزیر محنت فیصل ایوب کھوکھر، چیف سیکرٹری زاہد اختر زمان اور سینیٹر پرویز رشید شریک ہوئے، اجلاس میں وزیراعلیٰ مریم نوازنے مزدوروں کی فلاح وبہبود سے متعلق اہم منصوبوں کی منظوری دے دی۔
دوران اجلاس وزیراعلیٰ مریم نواز نے پنجاب بھر میں کم از کم اجرت کا نفاذ یقینی بنانے کا حکم دیتے ہوئے کہا کہ پنجاب بھر میں ورکروں کو کم از کم 37 ہزار ماہانہ ادائیگی یقینی بنائیں ۔
مریم نواز نے پنجاب بھر میں لیبرکالونیاں بنانے کیلئے صوبائی وزیر محنت سے پلان طلب کرلیا جبکہ پنجاب بھر میں سوشل سکیورٹی ہسپتالوں کی ری ویمپنگ کا بھی حکم دیا۔
اجلاس میں فیصلہ کیا گیا کہ لاہور اور راولپنڈی اسلام آباد میں پری سکینگ کیلئے مریم نوازشریف ویلنس سینٹرز بنائے جائینگے،مریم نوازویلنس سینٹر میں مریضوں کو سکریننگ کے بعد بڑے ہسپتال میں ریفرکیا جائے گا۔
دوران اجلاس لاہورڈیفنس روڈ پر 200 بیڈز کا رحمت اللعالمین کارڈیالوجی سینٹر بنانے کا اصولی فیصلہ ہوا جبکہ وزیراعلیٰ نے رحیم یار خان میں 50 بیڈز کے نئے سوشل سکیورٹی ہسپتال کی اصولی منظوری بھی دیدی۔
وزیراعلیٰ مریم نواز نے صوبائی وزیر فیصل ایوب کھوکھر کو مزدوروں کی فلاح وبہبود کیلئے لیبرلاز میں ترامیم کی ہدایت کرتے ہوئے کہا کہ محنت کش اللہ کے دوست ہیں،اللہ کے دوستوں کو ناراض نہیں کرسکتے،پنجاب کو مزدوروں کی فلاح وبہبود کے حوالے سے مثالی صوبہ بنانے کا عزم رکھتے ہیں۔
ان کا مزید کہنا تھا کہ مزدور کی اجرت،علاج معالجہ،بہترروزگار اوراپنی چھت کی فراہمی حکومت کی ذمہ داری ہے،کوئی مزدوربھوکا نہ سوئے،کسی کو دکھ اورپریشانی نہ ہو،مزدوروں کے بچوں کیلئے اعلی تعلیم کے بہتر مواقع مہیا کررہے ہیں۔
