حافظ آباد میں خاتون کا گینگ ریپ
![Image](/enews/2024/July/07-26-24/news_big_images/pakistan_31502356.jpg)
July, 26 2024
حافظ آباد:(ویب ڈیسک)پنجاب کے ضلع حافظ آباد میں ایک ہولناک واقعہ پیش آیا، جہاں ایک خاتون کا اس کے شوہر اور تین سالہ بیٹی کے سامنے گن پوائنٹ پر گینگ ریپ کیا گیا۔
یہ واقعہ اس وقت پیش آیا جب یہ خاندان موٹر سائیکل پر چنیوٹ جا رہا تھا اور سکھیکی کے قریب تین ڈاکوؤں نے انہیں روکا۔
ڈاکو خاتون کو قریبی کھیتوں میں لے گئے اور اس کے شوہر اور بیٹی کے سامنے اس کا گینگ ریپ کیا۔ اس خوفناک واقعے کے بعد ملک اور بیرون ملک غم و غصے کا اظہار کیا جا رہا ہے۔
واقعے کے بعد پولیس حکام کے درمیان دائرہ اختیار کا تنازع شروع ہو گیا۔ حافظ آباد اور ننکانہ صاحب اضلاع کی پولیس نے ایک دوسرے پر دائرہ اختیار نہ ہونے کا الزام لگایا۔ اس تنازع کے باعث خاندان کو بروقت مدد فراہم نہیں کی جا سکی۔
واقعہ کے بعد متاثرہ خاتون کو ہسپتال منتقل کر دیا گیا۔ حکام کے مطابق یہ خاندان چنیوٹ کا رہائشی تھا اور خاتون اپنے انکل سے ملنے کے بعد اپنے شوہر اور بیٹی کے ساتھ واپس آ رہی تھی۔
رات 11 بج کر 30 منٹ کے قریب تین ڈاکوؤں نے انہیں روکا اور جرم کرنے کے بعد فرار ہو گئے۔
اطلاع ملتے ہی ننکانہ پولیس نے حافظ آباد پولیس کو کال منتقل کر دی اور دعویٰ کیا کہ یہ ان کا دائرہ اختیار نہیں ہے۔ حافظ آباد پولیس نے بھی مختصر تفتیش کے بعد جائے وقوعہ کو ننکانہ پولیس کا دائرہ اختیار قرار دے دیا۔
دائرہ اختیار کے تنازعے کے دوران خاندان کو ایک یا اس سے زیادہ گھنٹے تک کوئی توجہ نہیں دی گئی۔ ڈی پی او حافظ آباد فیصل گلزار نے اس معاملے کا نوٹس لیا اور ہدایت دی کہ موقع پر پہنچ کر مقدمہ درج کیا جائے۔
بعد ازاں، سکھیکی پولیس نے نامعلوم ملزمان کے خلاف زیادتی کا مقدمہ درج کیا اور ایک مشتبہ ڈاکو کو گرفتار کر لیا۔ اس کے قبضے سے دو پستول بھی برآمد ہوئے۔
جمعرات کی صبح دوبارہ دونوں اضلاع کی پولیس کے درمیان دائرہ اختیار پر تنازعہ شروع ہو گیا۔ جب ننکانہ صاحب پولیس نے اس دعوے کو مسترد کر دیا کہ یہ واقعہ ان کے علاقے میں ہوا ہے۔
حافظ آباد پولیس نے تحصیلدار اور بورڈ آف ریونیو کے دیگر متعلقہ عملے کو موقع پر لے جا کر دائرہ اختیار کا تعین کیا۔
ڈی پی او حافظ آباد نے بتایا کہ اگرچہ یہ واقعہ ضلع ننکانہ صاحب میں پیش آیا تاہم انہوں نے اپنے ضلع کے تھانے میں ایف آئی آر درج کرنے کا حکم دیا۔
انہوں نے مزید کہا کہ گرفتار ملزم نے دوران تفتیش بتایا کہ اس کے ساتھی راولپنڈی کی طرف فرار ہو گئے ہیں، اور پولیس کی ٹیم کو ان کی گرفتاری کے لیے راولپنڈی روانہ کیا گیا ہے۔