چیف منسٹر چلڈرن ہارٹ سرجری پروگرام کے تحت اب تک 3 ہزار 162 بچوں کی کامیاب ہارٹ سرجری اور اینٹروینشن کی جا چکی ہے ، پروگرام کے تحت ملک بھر سے 7ہزار 436 مریض بچوں کی رجسٹریشن ہو چکی ہے ، سندھ،بلوچستان، آزاد کشمیر، گلگت بلتستان اور خیبرپختونخواکے ہارٹ پیشنٹ بچوں کی مفت ہارٹ سرجری کی جارہی ہے ۔

خیبرپختونخوا کے 316 ہارٹ پیشنٹ بچوں کی پنجاب کے سرکاری اور نجی ہسپتالوں میں مفت سرجری اور علاج ہوگا جبکہ سندھ کے 51بچوں کی ہارٹ سرجری کے لئے چلڈرن ہارٹ سرجری پروگرام میں رجسٹریشن کرائی گئی ۔

چلڈرن ہارٹ سرجری پروگرام کے تحت بلوچستان کے11بچوں کی مفت سرجری ہوگی جبکہ ہارٹ سرجری پروگرام کے تحت آزاد کشمیر کے158بچوں کی ہارٹ سرجری کے لئے رجسٹریشن کرائی گئی ، گلگت بلتستان کے 30بچوں کی ہارٹ سرجری ہوگی۔

چیف منسٹر چلڈرن ہارٹ سرجری پروگرام کے تحت سرکاری ہسپتالوں میں 2ہزار 419اور نجی ہسپتالوں میں 743 آپریشن ہوئے،وزیراعلی مریم نواز کے اس پروگرام کے تحت چلڈرن ہارٹ سرجری اور علاج کے اخراجات حکومت پنجاب ادا کررہی ہے۔

خیال رہے کہ چیف منسٹر ہارٹ سرجری پروگرام کے اجراء سے قبل ہرسال سینکڑوں بچے زندگی سے ہاتھ دھو بیٹھتے تھے ، لمبی ویٹنگ لسٹ اور ناکافی وسائل کی وجہ سے والدین بے بسی سے بچوں کو تکلیف میں مبتلا دیکھنے پر مجبور تھے۔

اس حوالے سے وزیراعلیٰ پنجاب مریم نواز نے کہا ہے کہ ننھے بچوں کی تکلیف برداشت نہیں، ہارٹ سرجری کے اخراجات حکومت دے گی،حکومت کے وسائل پر پہلا حق بچوں کا ہے، سب اپنے بچوں جیسے ہیں، پیدائشی امراض قلب میں مبتلا بچوں کا علاج ممکن حد تک جلد اور مفت ہوگا۔