چاہت فتح علی خان کاگانا ’بدو بدی 2‘ ریلیز
December, 26 2024
لاہور:(ویب ڈیسک) بے سُرے گانوں سے شہرت پانے والے خود ساختہ پاکستانی نژاد گلوکارچاہت فتح علی خان نے گانا ’بدوبدی 2‘ ریلیز کردیا۔
چاہت فتح علی خان نے اپنے انسٹاگرام اکاؤنٹ پر ’بدو بدی 2‘ گانا شیئر کیا ہے۔
اس گانے کی خاص بات 90 ءکی دہائی کے مشہور گانے "نچاں گے ساری رات سونیوں وے"کی طرز اور بول ہیں، جس کو چاہت فتح علی خان نے اپنے پرانے گانے "بدو بدی" کے ساتھ مکس اپ کیا ہے۔
اس گانے کی ویڈیو میں دیکھا جاسکتا ہے کہ بے سرے سنگر چاہت فتح علی خان کچھ لڑکیوں کیساتھ تھرک رہے ہیں اور ساتھ میں "بدوبدی 2 " گانا گارہے ہیں۔
ایسا لگتا ہے کہ یہ گانا ان کے مداحوں کو بھی بھا گیا ہے، کیوں کہ اب تک ہزاروں لوگ اسے دیکھ اور سن چکے ہیں۔
واضح رہے کہ چاہت فتح علی خان نے رواں سال عیدالفطر پر اپنے آفیشل یوٹیوب چینل پر گانا ‘بدو بدی’ اپلوڈ کیا تھا جو خوب وائرل ہوا تھا اور اس گانے پر 28 ملین ویوز آگئے تھے۔
28 ملین ویوز کے بعد یوٹیوب نے کاپی رائٹ کی وجہ سے چاہت فتح علی خان کا یہ گانا ڈیلیٹ کردیا تھا، گانا ڈیلیٹ ہونے پاکستان کے نامور گلوکار، یوٹیوبرز اور سوشل میڈیا صارفین نے خوشی کا اظہار کیا تھا۔
یاد رہے کہ چاہت فتح علی خان نے جس پنجابی گانے ’اکھ لڑی بدوبدی‘ کو اپنے منفرد انداز میں گایا، اسے پہلی بار ملکہ ترنم نورجہاں نے 1973ء میں ریلیز ہونے والی پاکستانی فلم ’بنارسی ٹھگ‘ کے لیے گایا تھا۔
’اکھ لڑی بدوبدی‘ کا شمار ماضی کے مقبول ترین گانوں میں ہوتا ہے ، جسے چاہت فتح خان سے پہلے بھی کئی فنکار اپنی آواز میں گاچکے ہیں۔ مگر انہیں کوئی خاص شہرت نہیں ملی۔
