سدھو موسے والا کاچھوٹابھائی کیسا؟ پہلی جھلک شیئر
November, 8 2024
امرتسر:(ویب ڈیسک)بھارت کے پنجاب سے تعلق رکھنے والے مشہور گلوکار سدھو موسے والا کے والدین نے اپنے چھوٹے بیٹے کی پہلی جھلک مداحوں کے ساتھ شیئر کر دی۔
اس تصویر کو انسٹاگرام پر سدھو موسے والا کے آفیشل اکاؤنٹ پر شیئر کیا گیا، جس میں بچے کو ہلکے گلابی رنگ کی پگڑی پہنے دیکھا جا سکتا ہے۔
سدھو موسے والا کے والد بلکور سنگھ اور والدہ چرن کور نے اپنے چھوٹے بیٹے کا نام شبھدیپ رکھا ہے، جو سدھو موسے والا کے اصلی نام کے ساتھ تعلق رکھتا ہے۔
بھارتی میڈیا رپورٹس کے مطابق، یہ بیٹا رواں سال مارچ میں پیدا ہوا تھا، جب کہ سدھو کے والد کی عمر 60 سال اور والدہ کی 58 سال تھی۔
یاد رہے کہ سدھو موسے والا، جن کا اصلی نام شبھدیپ سنگھ سدھو تھا، کو 29 مئی 2022 ءکو ان کے آبائی علاقے ضلع مانسا کے گاؤں جواہر میں نامعلوم افراد نے فائرنگ کر کے ہلاک کر دیا تھا۔
اس افسوسناک واقعے میں سدھو موسے والا کی گاڑی پر تقریباً 30 گولیاں برسائی گئیں، جس سے وہ موقع پر ہی جان کی بازی ہار گئے تھے جبکہ ان کے ہمراہ موجود دو افراد بھی شدید زخمی ہوئے تھے۔
سدھو موسے والا نے اپنے گانے خود لکھے اور پروڈیوس کیے تھے اور وہ پنجابی میوزک انڈسٹری کے امیر ترین اور مقبول ترین گلوکاروں میں شمار ہوتے تھے۔
