اہلخانہ کے مطابق وہ کچھ عرصے سے علیل تھے اور بیماری کا شکار تھے۔ان کے انتقال کی خبر نے پاکستانی شوبز انڈسٹری میں غم کی لہر دوڑا دی۔

عابد کشمیری نے اپنے فنی کیریئر میں سینکڑوں ٹی وی ڈراموں، اسٹیج پرفارمنسز اور فلموں میں اپنی صلاحیتوں کا لوہا منوایا۔ 1988 میں ریلیز ہونے والی فلم بازار حسن میں بہترین مزاحیہ اداکار کا کردار نبھانے پر انہیں نگار ایوارڈ سے نوازا گیا۔ ان کی معروف فلموں میں جیتے ہیں شان سے اور آہٹ شامل ہیں۔

ٹی وی ڈراموں کی دنیا میں بھی ان کا نمایاں کردار رہا،جن میں  لوہاری گیٹ،سورج کے ساتھ ساتھ، تیسرا کنارہ اوراپنے لوگ  جیسے کامیاب ڈرامے شامل ہیں۔ ڈرامہ سمندر میں ان کا کردار گلوبادشاہ بے حد مقبول ہوا۔

وزیر اعلیٰ پنجاب مریم نواز نے اداکار کے انتقال پر افسوس کا اظہار کرتے ہوئے سوگوار خاندان سے دلی ہمدردی کا اظہار کیا اور مرحوم کے درجات کی بلندی کے لیے دعا کی۔