گلوکار ملکو برطانیہ جاتے ہوئےجہاز سے آف لوڈ
June, 17 2024
لاہور :(ویب ڈیسک )عمران خان کی تعریف میں قیدی نمبر 804 گاکر مقبولیت حاصل کرنے والے گلوکار ملکو کوبرطانیہ جانے سے روک دیا گیا۔
تفصیلات کے مطابق پی ٹی آئی کے مقدمات کی پیروی کرنے والے معروف وکیل اظہر صدیق کی ایک ویڈیو سوشل میڈیا پر گردش کررہی ہے۔
لاہور ایئرپورٹ سے بنائی گئی ویڈیو میں اظہر صدیق نے کہا کہ مجھے برطانیہ سے فون آیا کہ ملکو کو پرفارم کرنے برطانیہ پہنچنا ہے، میں نے اپنی پوری کوشش کی یہ یہاں سے نکل جائیں لیکن انہیں آف لوڈ کردیا گیا۔
اسی ویڈیو میں ملکو گفتگو کرتے ہوئے بتایا کہ گانا گانے کی وجہ سے میرا نام پی ایل آئی لسٹ میں ڈال دیا گیا ہے۔
انہوں نے کہا کہ عوام مجھے سننا چاہتی ہے لیکن مجھے آف لوڈ کردیا گیا، اس سے دنیا میں کیا پیغام جائے گا۔
اظہر صدیق نے کہا کہ شہباز شریف، محسن نقوی ہوش کے ناخن لیں، آرٹسٹ کی کوئی سرحد نہیں ہوتی۔
ساتھ ہی پوسٹ میں انہوں نے لکھا کہ یہ فسطائیت نہیں تو اور کیا ہے، ملکو کا قصور صرف قیدی نمبر 804 کے لیے گانا گانا ہے۔
دوسر ی طرف پاکستان تحریک انصاف (پی ٹی آئی) سے تعلق رکھنے والے حامیوں اور رہنماؤں نے دعویٰ کیا کہ ملکو کو ان کے گانے قیدی نمبر 804 گانے کی وجہ سے آف لوڈ کیا گیا۔
خیال رہے کہ اڈیالہ جیل میں قید سابق وزیراعظم عمران خان کا قیدی نمبر 804 ہے اور اکثر ان کا ذکر کرتے ہوئے اس کا حوالہ دیا جاتا ہے
خیال رہے کہ ملکو کا اصل نام محمد اشرف ملک ہے جو اردو اور پنجابی زبان میں گانے گاتے ہیں۔
ضرور پڑھیں
