مرکزی بینک کی جانب سے تمام بینکوں کو ہدایت کی گئی ہے کہ وہ تاجروں کو ادائیگیوں کے ڈیجیٹل طریقے فراہم کریں جبکہ عام صارفین کے نئے بینک اکاؤنٹ کھولنے میں دو دن سے زیادہ کا وقت نہ لیا جائے۔
اسٹیٹ بینک آف پاکستان کی جانب سے کہا گیا ہے کہ نئے فریم ورک کا مقصد اکاؤنٹ کھولنے کا عمل آسان اور معیاری جبکہ دستاویزات کے تقاضوں کو معقول بنانا ہے ، صارفین کے پاس اپنی درخواستوں کو ٹریک کرنے کی سہولت بھی ہونی چاہیے جس سے یہ عمل شفاف اور صارف دوست بن جائے گا۔
یہ بھی پڑھیں: پاکستان میں پہلا اسمبل شدہ الیکٹرک وہیکل متعارف
مرکزی بینک کے مطابق کسٹمر آن بورڈنگ کا عمل مزید آسان، محفوظ اور مؤثر بنا دیا گیا ہے ، اب صارفین تمام اقسام کے اکاؤنٹس آن لائن کھول سکیں گے،تمام تاجروں کوڈیجیٹل ادائیگی قبول کرنے والے کم از کم ایک طریقے سے ضرور لیس کیا جائے، نئے تاجروں کو اکاؤنٹ کھولنے میں معاونت دی جائے۔
سٹیٹ بینک کی جانب سے جاری اعلامیہ میں مزید کہا گیا ہے کہ یہ اقدامات مالی شمولیت کو بڑھانے اور صارفین کے لیے سہولتیں بہتر بنانے کی کوششوں کا تسلسل ہیں،یہ اقدامات بینکنگ سسٹم سے باہر افراد اور تاجروں کو نظام میں شامل کرنے اور نقد ادائیگیاں ڈیجیٹائز کرنے کا ماحول بہتر بنائیں گے۔
