دی پنجاب پرائس کنٹرول آف ایسنشیل کموڈیٹیز (ترمیمی) بل 2025 پنجاب اسمبلی پیش کردیا گیا، قانون میں پرائس کنٹرول کونسل کے اختیارات میں تبدیلی ہو گی، ترمیمی بل کے تحت دی پنجاب پرائس کنٹرول آف ایسنشیل کموڈیٹیز ایکٹ 2024 میں ترامیم کی جائیں گی۔

پنجاب اسمبلی میں جمع کرائی گئی قرار داد کے متن میں بتایا گیا ہے کہ پرائس کنٹرول کونسل کی صدارت وزیر پرائس کنٹرول یا وزیراعلیٰ کے نامزد کردہ عوامی نمائندے کے پاس ہوگی۔

قرارداد کے متن کے مطابق تا حال پرائس کنٹرول کونسل کی صدارت وزیر صنعت و تجارت یا وزیراعلیٰ کے نامزد کردہ عوامی نمائندے کے پاس ہے،اس سے پہلے پرائس کنٹرول کی وزارت موجود نہیں۔

یہ بھی پڑھیں: حکومت اور شوگر ملز مالکان کے درمیان معاملات طے

حکومتی ذرائع کا بتانا ہے کہ وزارت کا قلمدان وزیر اعلیٰ پنجاب مریم نواز اپنے پاس رکھیں گی، نئے ارکان میں لائیو سٹاک، زرعی مارکیٹنگ ریگولیٹری اتھارٹی اور پنجاب سہولت بازاروں کے سربراہان کو شامل کیا جائے گا۔

پنجاب اسمبلی میں جمع کرائی گئی قرارداد کے متن میں کہا گیا ہے کہ وزارت میں ماہرین اور اسٹیک ہولڈرز کی تعداد تین، تین مقرر کرنے کی تجویز ہے۔

ذرائع کا بتانا ہے کہ دی پنجاب پرائس کنٹرول آف ایسنشیل کموڈیٹیز (ترمیمی) بل پنجاب اسمبلی کی متعلقہ کمیٹی کے حوالے کردیا گیا ہے، کمیٹی 2 ماہ تک اس حوالے سے رپورٹ ایوان میں پیش کرے گی۔