آل پاکستان جیمز اینڈ جیولرز ایسوسی ایشن کے مطابق ملکی صرافہ بازاروں میں 24 قیراط کے حامل فی تولہ سونے کی قیمت میں 3 ہزار روپے کی کمی ہوئی جس کے بعد ملکی صرافہ مارکیٹ میں فی تولہ سونے کی قیمت 3 لاکھ 59 ہزار روپے سے کم ہو کر 3 لاکھ 56 ہزار روپے پر آگئی۔

جیولرز ایسوسی ایشن کی جانب سے بتایا گیا کہ پاکستانی صرافہ مارکیٹوں میں 10 گرام سونے کے دام میں 2 ہزار 572 روپے گراؤٹ آئی جس کے بعد ملکی صرافہ بازاروں میں 10 گرام سونا 3 لاکھ 5 ہزار 212 روپے پر آگیا۔

دوسری جانب بین الاقوامی صرافہ بازاروں میں بھی سونا سستا ہو گیا، عالمی صرافہ مارکیٹ میں سونے کی قیمت 30 ڈالر فی اونس کمی آگئی جس کے بعد بین الاقوامی صرافہ بازاروں میں فی اونس سونا 3 ہزار 335 ڈالر کا رہ گیا۔

یہ بھی پڑھیں: پاکستان اسٹاک مارکیٹ میں نئی تاریخ رقم

یاد رہے کہ گزشتہ روز بھی ملکی سطح پر سونے کی فی تولہ قیمت میں 700 روپے کی کمی ریکارڈ کی گئی تھی جبکہ 10 گرام سونا 600 روپے سستا ہوا تھا، عالمی صرافہ بازاروں میں بھی سونا 7 ڈالر کی کمی کے ساتھ 3 ہزار 365 ڈالر فی اونس پر آگیا تھا۔

ادھر پاکستان روپے کی بے توقیری کا سلسلہ نہ رک سکا، انٹربینک میں امریکی ڈالر 29 پیسے مہنگا ہو گیا، انٹربینک میں امریکی ڈالر کا لین دین 284 روپے 96 پیسے پر بند ہوا۔