امریکی محکمہ خارجہ کے ترجمان میتھیو ملر نے پیر کو ہونے والی پریس بریفنگ میں پاکستان تحریک انصاف کے احتجاجی مظاہروں میں ہونے والی اموات سے متعلق سوال پر کہا کہ ہم چاہتے ہیں کہ دیگر ممالک کی طرح پاکستان بھی مظاہرین سے پرامن انداز میں نمٹے۔

میتھیو ملر کا کہنا تھا کہ ہم چاہتے ہیں کہ احتجاج پرامن ہوں، اور یہ بھی چاہتے ہیں کہ دنیا کے کسی بھی ملک کی طرح پاکستان کی حکومت بھی پرامن مظاہرین کے ساتھ احترام سے اور پرامن طریقے سے نمٹے، ہم دہشت گردی اور پرتشدد انتہا پسندی کے خلاف جنگ میں پاکستان کے ساتھ کھڑے ہیں۔

 ترجمان امریکی محکمہ خارجہ سے بھارتی وزیر خارجہ جے شنکر اور امریکی وزیر خارجہ اینٹنی بلنکن کے درمیان اٹلی میں ہونے والی ملاقات سے متعلق بھی استفسار کیا گیا کہ انڈین کاروباری شخصیت اڈانی پر فرد جرم عائد ہونے اور سکھ رہنما کے قتل میں مبینہ طور پر انڈین ایجنٹ کے ملوث ہونے کے بعد یہ پہلی ملاقات تھی، کیا اس ملاقات میں ان دونوں موضوعات پر کوئی بات ہوئی؟

اس پر امریکی محکمہ خارجہ کے ترجمان کا کہنا تھا کہ میں نجی سفارتی بات چیت پر گفتگو نہیں کروں گا تاہم جیسا کہ ہم نے پہلے بھی کہا ہے، ہم باقاعدگی سے اپنے انڈین ہم منصبوں کے ساتھ بات چیت میں ان معاملات اور ان کے مضمرات کو اٹھاتے ہیں۔