تفصیلات کے مطابق اپنے جاری کردہ بیان میں میں صدر لاہور چیمبر میاں ابوذر شاد نے وزیراعظم محمد شہباز شریف اور نائب وزیراعظم اسحاق ڈار کی قیادت میں جاری سفارتی و معاشی اقدامات کو سراہتے ہوئے کہا کہ ان کی قیادت نے پاکستان کو ایک بار پھر معاشی استحکام کی راہ پر گامزن اور بین الاقوامی سرمایہ کاروں کا اعتماد بحال کیا ہے۔
انہوں نے کہا کہ اسحاق ڈار کا حالیہ دورہ واشنگٹن ڈی سی پاکستان کی معاشی بحالی اور عالمی شراکت داریوں کے فروغ کے لیے حکومت کی ٹھوس کوششوں کا مظہر ہے۔
میاں ابوذر شاد کا کہنا تھا کہ نائب وزیراعظم اسحاق ڈار کی امریکی وزیر خارجہ مارکو روبیو سے اہم ملاقات میں بالخصوص تجارت، سرمایہ کاری، ٹیکنالوجی، زراعت اور معدنیات کے شعبوں سمیت دیگر امور پر تفصیلی تبادلہ خیال حوصلہ افزا ہے۔
صدر لاہور چیمبر نے واشنگٹن میں معروف تھنک ٹینک "اٹلانٹک کونسل" کے زیر اہتمام تقریب سے خطاب میں اسحاق ڈار کی شرکت کو بہت اہم پیش رفت قرار دیتے ہوئے کہا کہ لاہور چیمبر آف کامرس اینڈ انڈسٹری نائب وزیراعظم اسحاق ڈار کے اس ویژن کی مکمل حمایت کرتا ہے کہ پاکستان کو امداد کے بجائے باہمی فائدہ مند تجارت کی طرف بڑھنا چاہیے۔
انہوں نے اٹلانٹک کونسل میں دیے گئے پیغام کو ایک پر اعتماد اور مستقبل پر نظر رکھنے والی معاشی پالیسی کا عکاس اورپاکستان کی کاروباری برادری کی توقعات سے ہم آہنگ قرار دیا۔
صدر لاہور چیمبر کا مزید کہنا تھا کہ پاکستان کی مارکیٹوں کو امریکی مصنوعات کے لیے کھولنے اور ایک جامع تجارتی معاہدے کے حصول کی حکومتی کوششیں نہایت اسٹریٹجک اور بروقت ہیں جو سرمایہ کاروں کے اعتماد میں اضافہ اور دوطرفہ تجارت میں وسعت کا باعث بنیں گی۔
میاں ابوذر شاد نے مزید کہا کہ یہ بہترین حکمت عملی اور درست سمت میں اقدامات ہیں جو پاکستان کی معیشت کو استحکام بخشیں گے، غیرملکی سرمایہ کاری کو فروع دیں گے اور پاکستانی مصنوعات عالمی منڈی میں مسابقت حاصل کریں گی۔
اپنے خیالات کا اظہار کرتے ہوئے ان کا کہنا تھا کہ یہ پیشرفت امریکی کاروباری برادری کے اعتماد کو بھی تقویت دے گی، نائب وزیراعظم اسحاق ڈار کے انتہائی کامیاب دورہ امریکہ نے دنیا کو واضح اور بہترین پیغام دیا ہے۔
صدر لاہور چیمبر نے کہا کہ امریکہ پاکستان کی برآمدات، بالخصوص ٹیکسٹائل، گارمنٹس، لیدر مصنوعات اور سرجیکل آلات کے لیے سب سے بڑی منڈی ہے جبکہ پاکستان امریکی کپاس کا دوسرا بڑا خریدار ہے ۔ ڈپٹی پرائم منسٹر کے دورہ کے بعد یہ تجارتی تعلقات یقینا مزید وسیع ہونگے۔
ان کا کہنا تھا کہ امریکہ کے ساتھ فری ٹریڈ ایگریمنٹ یا باہمی سرمایہ کاری کا معاہدہ پاکستان کی صنعت کے لیے گیم چینجر ثابت ہو سکتا ہے۔
میاں ابوذر شاد نے حکومت کی اسٹریٹجک سفارتکاری اور عالمی کاروباری و سیاسی برادری سے موثر روابط پر حکومت کو سراہتے ہوئے کہا کہ وزیراعظم شہباز شریف اور ان کی معاشی ٹیم کی کوششوں کی بدولت دنیا ایک بار پھر پاکستان کی معاشی صلاحیت کو تسلیم کر رہی ہے۔
