خون کی کمی کو دور کرنے کیلئے چند آسان اور مفید غذائی اشیاء کا استعمال کیا جا سکتا ہے، جو جسم کو نہ صرف آئرن فراہم کرتی ہیں بلکہ قوت مدافعت کو بھی مضبوط بناتی ہیں۔ 

پھلیاں اور دالیں

پھلیاں اور دالیں، جیسے چنے، ماش، اور لوبیا، آئرن اور پروٹین کا بہترین ذریعہ ہیں۔ یہ جسم میں خون کی پیداوار بڑھانے کے ساتھ ساتھ توانائی فراہم کرنے میں بھی مددگارثابت ہوتے ہیں۔ 

سبز پتوں والی سبزیاں

پالک، میتھی اور سرسوں کے پتوں والی سبزیاں سردیوں میں خاص طور پر مفید ہیں۔ یہ آئرن، وٹامن K، اور فولیٹ سے بھرپور ہوتی ہیں، جو خون کی کمی دور کرنے میں مدد دیتی ہیں۔ 

خشک میوہ جات

بادام، کشمش اور انجیر جیسے خشک میوہ جات نہ صرف آئرن بلکہ دیگر اہم وٹامنز فراہم کرتے ہیں، جو سردیوں میں جسم کو گرم رکھنے اور قوت مدافعت بڑھانے میں اہم کردار ادا کرتے ہیں۔ 

گائے کا گوشت اور چکن

یہ دونوں پروٹین اور آئرن کے بہترین ذرائع ہیں،خاص طور پر گائے کا گوشت ہیم آئرن فراہم کرتا ہے، جو جسم میں آسانی سے جذب ہو جاتا ہے اور خون کی صحت کو بہتر بناتا ہے۔ 

مچھلی

مچھلی خاص طور پر سردیوں میں، اومیگا 3 فیٹی ایسڈز اور آئرن کی موجودگی کی وجہ سے صحت کیلئے فائدہ مند ہے۔ یہ نہ صرف خون کی پیداوار کو بہتر کرتی ہے بلکہ دل کی صحت کیلئے بھی بہت مفید ہے۔ 

انار اور چقندر

انار آئرن اور وٹامن C سے بھرپور ہوتا ہے، جو خون کی پیداوار بڑھانے میں مدد دیتا ہے۔ اسی طرح، چقندر فولیٹ، آئرن اور وٹامن C کی بدولت خون کی کمی کو دور کرنے کیلئے بہترین غذا ہے۔ 

دہی اور پانی

دہی میں پروٹین، کیلشیم، اور وٹامن B12 ہوتا ہے، جو خون کی صحت کیلئے ضروری ہے۔ سردیوں میں ہائیڈریشن کو برقرار رکھنے کے لیے پانی پینا بھی نہایت مفید ہے۔ 

اضافی ٹپس

آئرن کے جذب کو بہتر بنانے کیلئے وٹامن C سے بھرپور پھل جیسے نارنگی اور لیموں کا استعمال کریں۔ ان اشیاء کو اپنی روزمرہ خوراک میں شامل کر کے سردیوں میں خون کی کمی سے بچا جا سکتا ہے اور صحت مند زندگی گزاری جا سکتی ہے۔