ناہید اسلام کی قیادت میں ہونے والے مظاہروں نے وزیر اعظم شیخ حسینہ کے استعفیٰ کا سبب بننے کے بعد انہیں بین الاقوامی سطح پر بھی توجہ حاصل ہو رہی ہے۔

 

 

ناہید اسلام ڈھاکہ یونیورسٹی کے شعبہ سوشیالوجی کے طالب علم ہیں اور ایک انسانی حقوق کے کارکن بھی ہیں۔ وہ ملک بھر میں ’امتیاز کے خلاف طلبہ تحریک‘ کے قومی منتظم ہیں۔

 

 

ناہید اسلام کی قیادت میں طلبہ نے سرکاری ملازمتوں میں کوٹہ نظام کے خلاف احتجاج کا آغاز کیا۔ یہ تحریک وزیر اعظم شیخ حسینہ کے اقتدار کے خاتمے کا سبب بنی۔ ناہید اسلام نے دعویٰ کیا کہ انہیں تحریک کے دوران دو مرتبہ حراست میں لیا گیا اور پولیس نے ان کے ساتھ بدسلوکی کی۔

 

 

بنگلا دیشی طلبہ کا احتجاج جون 2024ء میں ہائی کورٹ کے فیصلے کے بعد شروع ہوا، جس میں عدالت نے سرکاری ملازمتوں سے متعلق کوٹہ سسٹم کو بحال کرنے کا حکم دیا تھا۔ اس نظام کے تحت 50 فیصد سے زائد سرکاری ملازمتیں کوٹہ سسٹم کے تحت دی جاتی تھیں، جس میں 30 فیصد کوٹہ 1971 ء میں بنگلا دیش بنانے کی تحریک میں حصہ لینے والوں کی اولاد کے لیے مختص تھا۔

 

 

جولائی کے وسط میں جب تحریک نے شدت اختیار کی تو سیکیورٹی فورسز نے مظاہرین کے خلاف طاقت کا استعمال کیا اور حکومت نے ملک بھر میں موبائل فون اور انٹرنیٹ سروس معطل کرتے ہوئے کرفیو نافذ کیا۔ پرتشدد مظاہروں کے دوران تقریباً تین سو افراد ہلاک ہوئے۔ 

 

سپریم کورٹ نے 21 جولائی کو کوٹہ سسٹم ختم کرنے کا فیصلہ دیا، تاہم احتجاجی مظاہروں کی شدت برقرار رہی اور وزیر اعظم شیخ حسینہ کو پیر کے روز استعفیٰ دے کر بھارت منتقل ہونا پڑا۔

 

 

ناہید اسلام نے پریس کانفرنس کرتے ہوئے آئندہ 24 گھنٹوں میں عبوری حکومت کے قیام کا مطالبہ کیا اور کہا کہ وہ آرمی چیف جنرل وقار الزماں سے ملاقات کریں گے۔ انہوں نے بطور نگران نوبیل انعام یافتہ معاشی ماہر محمد یونس کا نام پیش کیا۔

 

 

محمد یونس گرامین بینک کے سابق مینیجنگ ڈائریکٹر ہیں جنہیں غربت کے خاتمے کے اقدامات پر 2006ء میں نوبیل انعام سے نوازا گیا تھا۔ انہوں نے پسماندہ علاقوں کے افراد کو چھوٹے قرضوں کی فراہمی کے ذریعے غربت سے نکالا۔

 

ناہید اسلام نے واضح کیا کہ فوج کی حمایت یافتہ یا فوج کی قیادت میں کسی حکومت کو تسلیم نہیں کیا جائے گا۔

 

 

ناہید اسلام کی قیادت میں ہونے والے مظاہروں نے بنگلہ دیش کی سیاست میں اہم تبدیلی لائی ہے۔ کوٹہ نظام کے خلاف احتجاج نے نہ صرف موجودہ حکومت کو چیلنج کیا بلکہ مستقبل کے لیے بھی نئی راہیں کھول دی ہیں۔