کرکٹ آسٹریلیا کے چیف ایگزیکٹو، نک ہوکلے، نے ایک آن لائن پریس کانفرنس میں کہا کہ وہ پاکستان اور بھارت کے ساتھ باہمی سیریز اور سہ فریقی سیریز کے لیے تعاون کرنے کے لیے تیار ہیں۔  دونوں ممالک کے درمیان مقابلے ہمیشہ سے جوش و خروش کا باعث بنتے ہیں۔

 

 

نک ہوکلے نے بتایا کہ ٹی ٹونٹی ورلڈ کپ کے دوران نساؤ اسٹیڈیم ہاؤس فل تھا، اور آسٹریلیا میں 2022 ءکے ٹی ٹونٹی ورلڈ کپ میں بھی اسی طرح کا جوش دیکھنے کو ملا۔ ان کا کہنا تھا کہ پاکستان اور بھارت کے درمیان باہمی سیریز کی بحالی میں کرکٹ آسٹریلیا خوشی محسوس کرے گا۔

 

 

ہوکلے نے کہا کہ اس سال کرکٹ آسٹریلیا کا شیڈول بہت مصروف ہے، اس لیے باضابطہ بات نہیں ہو سکی، لیکن مستقبل میں میزبانی کا موقع ملے تو یہ ایک شاندار تجربہ ہوگا۔ انہوں نے کہا کہ پاکستان اور بھارت کے ٹورز کے منتظر ہیں اور دونوں ممالک کے فینز بھی سیریز کے دوران بہت پرجوش ہوتے ہیں۔

 

 

نک ہوکلے نے بتایا کہ بھارت کے ساتھ سیریز کے لیے ٹکٹوں کی فروخت ماضی کے مقابلے میں چھ گنا زیادہ ہو چکی ہے۔ انہوں نے مزید کہا کہ کرکٹ آسٹریلیا نے پاکستان ویمن کرکٹ کی میزبانی کی ہے اور وہ ہوم اینڈ اوے کی بنیاد پر کھیلنا چاہتے ہیں۔

 

 

ہوکلے نے افغانستان کرکٹ ٹیم کی تعریف کرتے ہوئے کہا کہ انہوں نے ٹی ٹونٹی ورلڈ کپ میں عمدہ کارکردگی کا مظاہرہ کیا۔ افغانستان کرکٹ ٹیم میں باصلاحیت کرکٹرز موجود ہیں اور کرکٹ آسٹریلیا ان کے ساتھ باہمی سیریز کے حوالے سے حکومت سے مشاورت کرتا ہے۔

 

 

نک ہوکلے نے مزید کہا کہ وہ افغانستان کرکٹ بورڈ کے ساتھ رابطے میں رہتے ہیں اور باہمی سیریز کھیلنے کے حوالے سے حکومت اور ہیومن رائٹس باڈیز کی ایڈوائس پر عمل کرتے ہیں۔