9 سال تک یوٹیوب کی چیف ایگزیکٹو آفیسر (سی ای او) رہنے والی سوزن ووجکی نے اپنے عہدے سے مستعفی ہونے کا اعلان کیا ہے۔ ان کے بعد ہندوستانی نژاد نیل موہن اس سوشل میڈیا پلیٹ فارم کے چیف ایگزیکٹو آفیسر بن گئے ہیں۔ 54 سالہ سوزین کا کہنا ہے کہ وہ اپنی فیملی، صحت اور ذاتی زندگی پر توجہ دینا چاہتی ہیں اور اسی وجہ سے وہ اپنے عہدے سے استعفیٰ دے رہی ہیں۔ انہوں نے کہا کہ9 سال قبل جب انہوں نے یوٹیوب میں کام کرنا شروع کیا تھا تو انہوں نے ایک بہترین لیڈرشپ ٹیم بنائی تھی، نیل موہن اس ٹیم کا حصہ تھے۔

سوزن ووجکی کی جگہ لینے والے نیل موہن نےاسٹینفورڈ یونیورسٹی سے الیکٹریکل انجینئرنگ کی تعلیم حاصل کی۔ وہ پہلے گوگل میں چیف پروڈکٹ آفیسر کے طور پر کام کر چکے ہیں۔ اس سے پہلے وہ مائیکرو سافٹ میں بھی کام کر چکے ہیں اور بائیو ٹیکنالوجی کے شعبے میں کام کرنے والی کمپنی 23 اینڈ می کے بورڈ میں بھی رہ چکے ہیں۔

سوزن ووجکی نے جمعرات کو ایک بلاگ پوسٹ میں اپنے استعفیٰ کے بارے میں آگاہ کیا اور لکھا کہ یہ وقت ان کے لیے بہترین ہے کیونکہ اس وقت یوٹیوب کو سنبھالنے کے لیے ایک بہترین قیادت کی ٹیم موجود ہے۔ اپنے بلاگ میں، انہوں نے لکھا، ” میں اس کے بانی لیری پیج اور سرجی برن کے ساتھ اس وقت سے وابستہ ہوں، جب سے گوگل 25 سال قبل ایک گیراج میں بنایا گیا تھا۔ اس کے بعد میں نے گوگل کے لیے کام کرنے کا فیصلہ کیا۔” انہوں نے اسے اپنی زندگی کا “بہترین فیصلہ” قرار دیا۔

سوزن نے مینلو پارک، کیلیفورنیا میں اپنے والد کے گھر کا گیراج لیری پیج اور سرگئی برن کوماہانہ کرائے پر دیا تھا ۔ اس گیراج میں ہی گوگل سرچ انجن بنایا گیا تھا۔ ایک سال بعد اس نے گوگل میں کام کرنا شروع کیا۔ وہ سرکاری طور پر گوگل کی 16 نمبر کی ملازم تھی۔ سوزن نے لکھا کہ اس وقت بہت کم لوگ گوگل استعمال کرتے تھے اور اس کی کوئی آمدنی نہیں تھی۔ میں نے DoubleClick کے حصول سے لے کر AdSense کی تخلیق تک یہاں بطور مارکیٹنگ مینیجر کلیدی کردار ادا کیا۔

2006 ء میں گوگل نے یوٹیوب کو 1 اعشاریہ 65 بلین ڈالر کی لاگت سے خریدا اور اس کے بعد 2014 میں سوزن اس کی چیف ایگزیکٹو آفیسر بن گئیں۔ اب نو سال بعد وہ اس عہدے سے مستعفی ہو رہی ہیں۔ استعفیٰ کے حوالے سے انہوں نے لکھا، “میں نے نیل موہن کے ساتھ تقریباً 15 سال کام کیا ہے۔ مجھے امید ہے کہ وہ یوٹیوب کے لیے بہترین لیڈر ثابت ہوں گے۔ یوٹیوب جو کام شارٹس، اسٹریمنگ، سبسکرپشنز پر کر رہا ہے، اس سے لے کر مصنوعی ذہانت تک، آگے مزید چیلنجز ہوں گے، اور نیل اس دوران یوٹیوب کی قیادت کرنے کے لیے بہترین شخص ہوں گے۔”

انہوں نے لکھا کہ وہ نیل موہن کو نیا کردار ادا کرنے میں مدد کریں گی اور فی الحال کچھ ٹیموں کے ساتھ کام کرنا جاری رکھیں گی۔امریکا میں رہنے والے ہندوستانی نژاد نیل موہن کی پیدائش کہاں ہوئی اس کے بارے میں کوئی معلومات نہیں ہے۔ انہوں نے 1996 میں سٹینفورڈ یونیورسٹی سے الیکٹریکل انجینئرنگ کی تعلیم حاصل کی جس کے بعد 2005 میں یہاں سے ایم بی اے کیا۔ اس کے بعد، سب سے پہلے 1996 میں، انہوں نے ٹیکنالوجی کمپنی Accenture میں سینئر تجزیہ کار کے طور پر کام کیا۔

اس کے بعد انہوں نے کچھ عرصہ مائیکرو سافٹ اور پھر ڈبل کلک میں پانچ سال کام کیا۔ اس کے بعد وہ گوگل میں ڈسپلے اور ویڈیو اشتہارات کے سینئر نائب صدر بن گئے۔ 2015 سے، وہ یوٹیوب کے چیف پروڈکٹ آفیسر کے طور پر کام کر رہے ہیں۔

نیل موہن بائیو ٹیک کمپنی 23 اینڈ می اور کپڑوں کی کمپنی اسٹیچ فکس کے بورڈ میں بھی شامل ہیں۔یوٹیوب نے 2021 ء میں مختصر عمودی ویڈیوز کا شارٹس فارمیٹ لانچ کیا۔ تاکہ TIKTOK کمپنی کو چیلنج دیا جا سکے۔ اب وہ یوٹیوب میں مزید کیا تبدیلیاں لائیں گے، یہ وقت ہی بتائے گا۔