لاہور: (ویب ڈیسک) گزشتہ روز نارووال میں وزیراعلیٰ پنجاب مریم نواز کے پروٹوکول اسکواڈ کی گاڑی سے نوجوان کی ہلاکت پر حکومت پنجاب کا ردعمل سامنے آگیا۔

صوبائی حکومت نے وضاحت دیتے ہوئے بیان جاری کیا ہے کہ مریم نواز ہیلی کاپٹر کے ذریعے کرتارپور پہنچی تھیں، جب حادثہ پیش آیا اس وقت مریم نواز سکیورٹی اسکواڈ کے ساتھ نہیں تھی۔

یہ بھی پڑھیں:

پنجاب حکومت کے ترجمان کا کہنا ہے کہ وزیراعلیٰ پنجاب مریم نواز نے ٹکر سے نوجوان کی ہلاکت کا نوٹس لیتے ہوئے فوری کارروائی کا حکم دیا ہے، حادثے میں ملوث ملزمان کی گرفتاری کے لیے ہدایات بھی جاری کردی ہیں۔

ترجمان صوبائی حکومت پنجاب کا کہنا تھا کہ مریم نواز 18 اپریل کو کرتارپور ہیلی کاپٹر کے ذریعے پہنچی تھیں اور حاڈثے یا ٹکر کے وقت وہ ہیلی کاپٹر میں تھیں سکیورٹی پروٹوکول کے ساتھ نہیں تھیں۔

ترجمان نے کہا کہ وزیراعلیٰ پنجاب کے حکم پر پولیس نے مقدمہ درج کرکے نوجوان کی موت کی تحقیقات بھی شروع کردی ہیں۔

عینی شاہدین کے بیانات اور ابتدائی رپورٹس کے مطابق 23 سالہ محمد ابوبکر مبینہ طور پر ایلیٹ فورس کی گاڑی کی زد میں آکر جان کی بازی ہار گیا تھا، اور یہ گاڑی جس سے نوجوان کی ٹکر ہوئی وہ وزیراعلیٰ پنجاب کے پروٹول کی گاڑیوں کا حصہ تھی۔

ٹکر سے نوجوان کی ہلاکت کا معاملہ کرتارپور جاتے ہوئے شکر گڑھ روڈ پر چندووال اسٹاپ پر پیش آیا جہاں پر مریم نواز نے بیساکھی تہوار کی تقریب میں شرکت کی تھی تاہم صوبائی حکومت نے ان خبروں کو مسترد کر دیا ہے۔

یہ بھی پڑھیں:

ڈی ایس پی نارووال نے میڈیا کو بتایا ہے کہ واقعے کی سی سی ٹی وی فوٹیج حاصل کرلی ہے، جس میں انہوں نے دعویٰ کیا ہے کہ جاں بحق ہونے والے نوجوان ابوبکر کو نامعلوم موٹر سائیکل کی ٹکر کے باعث زمین پر گرتے ہوئے دیکھا جاسکتا ہے، زمین پر گرنے کے بعد وہ سرکاری گاڑی سے ٹکرایا جس کے نتیجے میں وہ جان کی بازی ہار گیا تھا۔

ڈسٹرک پولیس آفیسر نوید ملک نے بتایا کہ نامعلوم موٹر سائیکل سوار کی تلاش جاری ہے تاہم ابھی تک انہیں اس کے بارے میں کوئی اطلاع نہیں ملی۔، انہوں نے مزید بتایا کہ ابوبکر کو ٹکرانے والی سرکاری گاڑی کے ڈرائیور کے خلاف محکمانہ انکوائری کا آغاز کردیا گیا ہے۔