لاہور: (سنو نیوز) کاکول فٹنس کیمپ میں شرکت کے بعد پاکستانی کھلاڑیوں نے اظہار خیال کیا ہے کہ اس فٹنس کیمپ سے پاکستان کو انٹرنیشنل کرکٹ میں بہت فائدہ ہوگا۔

کاکول فٹنس کیمپ سے متعلق گفتگو کرتے ہوئے کپتان بابر اعظم کا کہنا ہے کہ فزیکل ٹریننگ کیمپ سے ہمیں انٹرنیشنل کرکٹ میں بہت فائدہ ہوگا، انہوں نے مزید بتایا کہ میرا اس طرح کا یہ تیسرا کیمپ تھا جب بھی آئے ہیں کچھ نہ کچھ سیکھ کر گئے ہیں۔

کپتان بابراعظم نے بتایا کہ اس کیمپ کا اصل مقصد ٹیم میں اتحاد تھا اور اس پر بہت کام ہوا، کیمپ کے بعد ہمیں فزیکل فٹنس کی فکر نہیں رہے گی۔

یہ بھی پڑھیں:

کپتان بابراعظم نے اعظم خان کی ٹریننگ پر بات کرتے ہوئے کہا کہ فٹنس کیمپ میں میرے لیے سب سے یادگار لمحہ اعظم خان کا پہاڑ کی چوٹی سر کرنا تھا۔

پاکستان کرکٹ ٹیم کے آل راؤنڈر شاداب خان نے کاکول فٹنس کیمپ سے متعلق اپنے خیالات کا اظہار کرتے ہوئے کہا ہے کہ ورلڈ کپ سے قبل یہ فٹنس کیمپ بہت ضروری تھا، کھلاڑی جتنے زیادہ فٹ ہوں گے ٹیم کو فائدہ ہوگا۔

شاداب خان نے مزید بتایا کہ کیمپ کے ذریعے کھلاڑیوں کو ایک دوسرے کو سمجھنے کا بھرپور موقع ملا ہے۔

پاکستان کرکٹ ٹیم کے فاسٹ باؤلر نے فٹنس کیمپ بارے بتایا کہ اس طرح کی ٹریننگ ہمارے لیے بالکل نئی تھی لیکن ہم اس کے عادی ہوگئے، انہوں نے مزید کہا کہ کسی بھی ایونٹ سے قبل ٹیم بونڈنگ ضروری ہوتی ہے اس کیمپ سے اس میں مدد ملی۔

انٹرنیشنل کرکٹ ٹیم میں واپس کرنے والے عماد وسیم کا کہنا تھا کہ یہ ٹریننگ کرکٹ کی عام ٹریننگ سے مختلف لیکن بہت کارآمد رہی، آرمی کے ٹرینرز نے کھلاڑیوں کی فٹنس پر بہت زیادہ محنت کی ہے۔

یہ بھی پڑھیں:

پاکستان کرکٹ ٹیم کے سٹار فاسٹ باؤلر نسیم شاہ نے کاکول کیمپ سے متعلق کہا کہ اس ٹریننگ میں جم ورک کم تھا ، زیادہ توجہ اسٹیمنا پر تھی، انہوں نے مزید بتایا کہ یہ ٹریننگ ٹیسٹ کرکٹ میں ہمیں کام آئے گی جہاں زیادہ اسٹیمنا درکار ہوتا ہے۔

وکٹ کیپر بیٹسمین اعظم خان نے کاکول فٹنس کیمپ کو سخت ترین قرار دیا، اعظم خان کا کہنا تھا کہ سطح سمندر سے بلندی کی وجہ سے یہ کیمپ بہت سخت تھا لیکن اس کا فائدہ بھی ہوا ہے، انہوں نے مزید بتایا کہ پہاڑ کی چوٹی تک پہنچنے کا ایک منفرد تجربہ تھا جو ہمیشہ یاد رہے گا۔

یاد رہے کہ گزشتہ دنوں سوشل میڈیا پر ٹریننگ کیمپ سے اعظم خان کی پہاڑ کی چوٹی پر چڑھنے کی ویڈیو وائرل ہوئی تھی جہاں پر پوری ٹیم ان کا استقبال کرکے ان کا حوصلہ بڑھا رہی تھی۔