حج 2027: عازمین کی رجسٹریشن رواں ماہ شروع ہونے کا امکان
وزارت مذہبی امور نے حج 2027 کی لازمین رجسٹریشن رواں ماہ (جون 2026) میں شروع کرنے کا عندیہ دیا ہے۔
ترجمان وزارت مذہبی امور کی جانب سے جاری ایک بیان میں کہا گیا ہے کہ سعودی حکومت قوانین کے مطابق حج 2027ء کے لیے انتظامات کی تیاری کا آغاز کر دیا گیا ہے۔
وزارت مذہبی امور کے ترجمان کا کہنا تھا کہ آئندہ برس 2027 میں حج پر جانے کے خواہشمند پاکستانیوں کی رجسٹریشن کے لیے ان کے پاس کارآمد پاسپورٹ کا ہونا لازمی ہے، پاسپورٹ کی میعاد 16 نومبر 2027 تک ہونا ضروری ہے۔
ترجمان نے کہا کہ خواہشمند عازمین کرام جلد از جلد اپنا پاکستانی پاسپورٹ بنوا لیں، رجسٹرڈ افراد سرکاری یا پرائیویٹ حج اسکیم میں شمولیت اختیار کر سکیں گے۔
وزارت مذہبی امور کے ترجمان کا مزید کہنا تھا کہ بیرون ملک مقیم پاکستانی عازمین حج کو بھی لازمی طور پر رجسٹریشن کرانا ہو گی ، حج پیکیج کے اخراجات اور شرائط و ضوابط سے متعلق تفصیلات اگلی حج پالیسی کے مطابق بعد میں جاری کی جائیں گی۔
یہ بھی پڑھیں: وسیم اکرم نے حج کے دوران پیش آنیوالی مشکلات پر لب کشائی کر دی
یاد رہے کہ گزشتہ دنوں سعودی وزارت حج و عمرہ کے زیر اہتمام بعد از حج ’’ختامہ مسک‘‘ کانفرنس منعقد ہوئی تھی جس میں پاکستان کی نمائندگی وفاقی وزیر مذہبی امور سردار محمد یوسف نے کی۔
کانفرنس کے دوران سعودی وزیر حج و عمرہ کی جانب سے اگلے حج انتظامات فوری شروع کرنے کا عندیہ دیا گیا تھا۔
