تفصیلات کے مطابق 20 جنوری کو ہونے والی حلف برداری کی تقریب جو پہلے کانگرس کے کھلے میدان میں ہونے والی تھی، اب کانگرس کی بلڈنگ کے اندر روٹونڈا ایریا میں منعقد ہو گی۔

واضح رہے کہ روٹونڈا ایریا میں تقریباً 300 سے 800 افراد کے بیٹھنے یا کھڑے ہونے کی گنجائش موجود ہے،جبکہ نئے منتخب ہونے  امریکی صدر نے تقریب کیلئے تقریباً 25 ہزار کے قریب مہمانانِ گرامی کو مدعو کیا ہوا ہے۔

مزید برآں لاکھوں ٹرمپ سپورٹرز کو بھی اس تقریب میں شرکت  کیلئے دعوت نامے بھیجے گئے ہیں۔

اس صورتحال کو دیکھتے ہوئے سیکرٹ سروس نے حفاظتی اقدامات سخت کر دیے ہیں اور نشستوں کے انتظامات میں بھی تبدیلیاں کی جا رہی ہیں۔

خیال رہے کہ صدر ڈونلڈ ٹرمپ نے حلف برداری کی تقریب کانگرس کی بلڈنگ کے اندر رکھنے کے احکامات جاری کیے ہیں، تاکہ سخت سردی کی شدت سے محفوظ رہا جاسکے۔

جاری کردہ رپورٹس کے مطابق 20 جنوری کو واشنگٹن میں درجہ حرارت منفی 12 ڈگری سینٹی گریڈ سے نیچے گرنے کی پیشگوئی کی گئی ہے، جس کے باعث تقریب حلف برداری کے مقام میں تبدیلی کا فیصلہ کیا گیا۔

بین الاقوامی میڈیا کے مطابق تقریب میں صدر اور نائب صدر کے حلف اٹھانے کے بعد ایک خصوصی وکٹری تقریب کیپٹل ون ایرینا میں ہو گی، جہاں بڑی اسکرینوں کی مدد سے حاضرین اور سپورٹرز کا شکریہ ادا کیا جائے گا۔ اس تقریب میں مہمانانِ گرامی کا شاندار استقبال بھی کیا جائے گا۔

ذہن نشین رہے کہ یہ تبدیلی نہ صرف تقریب کو موسمی اثرات سے محفوظ رکھے گی بلکہ مہمانوں اور شرکاء کیلئے بہتر سہولیات کی فراہمی کو بھی یقینی بنائے گی۔