چیئرمین پاکستان تحریک انصاف (پی ٹی آئی) بیرسٹر گوہر نے جوڈیشل کمپلیکس میں میڈیا سے گفتگو کرتے ہوئے کہا کہ خیبرپختونخوا میں سینٹ الیکشن خوش اسلوبی کے ساتھ ہوئے ہیں، پی ٹی آئی نے اس میں سارے نام پہلے ہی فائنل کر لیے تھے، اس میں ایک نام بھی ایسا نہیں جو عمران خان کی مشاورت کے بغیر ڈالا گیا ہو۔

یہ بھی پڑھیں: مولانا طارق جمیل کی عمران خان سے متعلق وائرل ویڈیو جعلی قرار

بیرسٹر گوہر علی خان نے کہا کہ مارچ 2024 میں یہ سارا کچھ فائنل ہوگیا تھا، پھر مخصوص نشستوں کی وجہ سے اس میں بریک آ گیا تھا، جب مخصوص نشستوں کا فیصلہ ہوا تو ہم سمجھے کہ ہمیں اتنی سیٹیں اب نہیں ملیں گی جتنی ہماری بنتی ہیں، ہم اتنے کی ہی توقع کر رہے تھے یہ بہتر ہوا ہے، ہمیں 6 سیٹیں ملی ہیں یہ بہترین ہو گیا ہے۔

انہوں نے کہا کہ 9 مئی کے بعد پریس کانفرنس کرنے والے لوگوں کو ٹکٹ دینے کی بات درست نہیں ہے، لوگ مرزا آفریدی کا نام لیتے ہیں جبکہ خود عمران خان نے ان کا نام فائنل کیا تھا، مرزا آفریدی نے پارٹی کے خلاف کوئی بیان نہیں دیا ہے، مرزا افریدی پارٹی بیانیے اور پارٹی مفادات میں ہمیشہ ہمارے ساتھ رہے ہیں۔

ان کا کہنا تھا کہ دو سال ہو گئے ہیں، اب سختیاں ختم ہونی چاہیے، بانی پی ٹی آئی سے سب کی ملاقات ہونی چاہیے، عمران خان سے ملاقات کے حوالے سے عدالتی فیصلے موجود ہیں تاہم ان کی خلاف ورزی کی جا رہی ہے، بانی پی ٹی آئی سے آخری ملاقات بیرسٹر سیف کی ہوئی پھر ان کی بہنوں کی ملاقات ہوئی، پی ٹی آئی کے لوگوں کو نکالنا نہیں پڑتا لوگ خود نکلتے ہیں۔