پشاور میں میڈیا سے گفتگو کرتے ہوئے وزیراعلیٰ خیبرپختونخوا علی امین گنڈاپور کا کہنا تھا کہ کل انتخابات کے حوالے سے مشاورتی ملاقات ہوئی تھی، اسلام میں شک کرنا حرام ہے ، سینیٹ انتخابات میں ہارس ٹریڈنگ ہوتی ہے ، میں اسے ڈنکی ٹریڈنگ کہتا ہوں۔

علی امین گنڈا پور نے کہا کہ گھوڑا ایک بڑا قابل عزت جانور ہے اور میں خود گھوڑوں کا بہت شوقین ہوں، دیکھا جائے تو گدھا بھی خدمت کرنے والا جانور ہے، سینیٹ میں خرید و فروخت اس سے بھی گھٹیا کام ہے، اس لئے ہم نے فیصلہ کیا ہے سینیٹ میں خرید و فروخت نہیں ہونی چاہیے۔

وزیراعلیٰ نے کہا کہ صوبے کی تاریخ میں پہلی بار اتنا اچھا فیصلہ ہورہا ہے، اس سے پہلے پنجاب سینیٹ انتخابات میں ہم نے یہی کیا ہے، بانی پی ٹی آئی عمران خان نے جو فیصلہ کیا تھا اسی فارمولے پر عمل کریں گے۔

یہ بھی پڑھیں: خیبرپختونخوا میں پی ٹی آئی، ن لیگ اور پی پی ایک پیچ پر

ان کا کہنا تھا کہ عدالتی حکامات کے مطابق مخصوص نشستوں کے منتخب اراکین گورنر ہاؤس میں حلف لے رہے ہیں، ناراض امیدواروں کے خلاف پارٹی کارروائی کرے گی،عمران خان کے فیصلے کی نفی بانی پی ٹی آئی کی نفی ہے۔

علی امین گنڈاپور نے کہا کہ اپوزیشن سے اتحاد صرف سینیٹ انتخابات تک ہے، اپوزیشن کے ساتھ پہلے 8 اور 3 کے فارمولے پر اتفاق ہوا تھا، ہمارے امیدواروں کی جانب سے کاغذات واپس نہ لینے سے ہمیں نقصان ہوا،اب ہمیں 6 اور اپوزیشن کو 5 نشستیں ملی، جو بھی ہورہا ہے وہ بانی پی ٹی آئی کے احکامات پر ہورہا ہے۔