وہ پاکستان آرمی کے سپیشل سروس گروپ (ایس ایس جی) کے پہلے کمانڈو اور تیسرے مسیحی ہیں جنہوں نے میجر جنرل کے عہدے تک ترقی پائی ہے۔

 

 ان کی اس کامیابی نے نا صرف فوجی حلقوں میں بلکہ مسیحی برادری میں بھی خوشی کی لہر دوڑا دی ہے۔

 

 

آرمی چیف جنرل عاصم منیر کی صدارت میں ہونے والے آرمی سیلیکشن بورڈ کے اجلاس میں 22 بریگیڈیئرز کو میجر جنرل کے عہدے پر ترقی دی گئی۔ 

 

ان ترقی پانے والے فوجی افسران میں 13 بریگیڈیئرز کا تعلق انفنٹری سے جبکہ نو بریگیڈیئرز کا تعلق آرمڈ کور، آرٹلری، ایئر ڈیفنس، ایوی ایشن، کور آف ملٹری انٹیلی جنس اور ای ایم ای سے ہے۔

 

 

میجر جنرل جولین معظم جیمز سے پہلے پاکستان آرمی میں جنرل کے رینک تک پہنچنے والے مسیحی افسران میں میجر جنرل نوئل اسرائیل کھوکھر اور میجر جنرل جولین پیٹر شامل ہیں، جو اپنے عہدوں سے سبکدوش ہو چکے ہیں۔ 

 

ان افسران نے اپنی بہترین خدمات اور پیشہ ورانہ صلاحیتوں کے ذریعے پاکستانی مسلح افواج میں ایک مضبوط مقام حاصل کیا۔

 

 

جنرل یا اس کے مساوی عہدے تک پہنچنے والے دیگر مسیحی افسران میں ایئر وائس مارشل ایرک جی ہال، ایئر وائس مارشل مائیکل جان اوبرائن، ایئر ایڈمیرل نارمن من گون، میجر جنرل (مرحوم) پیٹر جولین، میجر جنرل نوئیل اسرائیل کھوکھر اور میجر جنرل جولین معظم جیمز شامل ہیں۔

 

 

 ان افسران نے پاکستانی مسلح افواج میں مختلف مواقع پر اپنی خدمات فراہم کیں اور نمایاں کامیابیاں حاصل کیں۔

 

 

میجر جنرل جولین معظم جیمز نے ایس ایس جی بریگیڈ تربیلا اور ایئر ڈیفنس برگیڈ سرگودھا کی کمان کی ہے۔

 

 اس کے علاوہ انہوں نے نائجیریا میں تین سال دفاعی اتاشی کے فرائض بھی سرانجام دیے ہیں۔ ان کی خدمات اور تجربات نے ان کو پاکستانی مسلح افواج میں ایک منفرد مقام دلایا ہے۔

 

 

میجر جنرل جولین معظم جیمز نے ایئر ڈیفنس سٹاف کورس، انٹیلی جنس سٹاف کورس، پاکستان سٹاف کورس اور نیشنل سکیورٹی وار کورس مکمل کیے ہیں۔ ان کی تعلیمی اور پیشہ ورانہ تربیت نے انہیں ایک بہترین اور مستند فوجی افسر بنایا ہے۔

 

 

ڈاکٹر آئزق عاشر، جو میجر جنرل جولین جیمز کے قریبی دوست ہیں، نے ان کی ترقی کو نا صرف میجر جنرل جیمز اور ان کے خاندان بلکہ پاکستان کی مسیحی برادری کے لیے بھی فخر کا لمحہ قرار دیا۔ انہوں نے کہا کہ مسیحی کمانڈو کو قابلیت کی بنا پر ترقی پاکستان کی مسلح افواج کا ایک تاریخی سنگ میل ہے۔

 

 

بشپ چرچ آف پاکستان کے صدر آزاد مارشل نے اس خبر پر خوشی کا اظہار کرتے ہوئے کہا کہ یہ پاکستان میں مسیحیوں کے لیے بہت فخر کا دن ہے۔ انہوں نے کہا کہ ہم ایک قابل ذکر میجر جنرل کے عہدے پر ترقی کا جشن منا رہے ہیں۔ پاک فوج کی 76 سالہ تاریخ میں پہلے ایس ایس جی کرسچن کمانڈو آفیسر میجر جنرل جولین معظم جیمز کی حیثیت سے تاریخ رقم کرتے ہوئے، یہ سنگ میل ہمارے لیے باعث فخر ہے۔

 

 

وزیر اعظم محمد شہباز شریف نے میجر جنرل جولین معظم جیمز کو میجر جنرل کے رینک پر ترقی پانے پر مبارکباد دی ہے۔ ایک بیان میں وزیر اعظم نے میجر جنرل جیمز کے مستقبل کے لیے نیک خواہشات کا اظہار کیا اور کہا کہ مسیحی برادری کی پاکستان کی تعمیر و ترقی و دفاع کے لیے خدمات ناقابل فراموش ہیں۔

 

وزیراعظم نے مزید کہا کہ میجر جنرل جولین جیمز کی پیشہ ورانہ صلاحیتیں اور ان کی محنت و لگن نوجوان نسل کے لیے مشعل راہ ہیں۔ ان کی ترقی پاکستان کی مسیحی برادری کے لیے ایک مثبت پیغام ہے اور اس سے یہ ظاہر ہوتا ہے کہ پاکستان کی مسلح افواج میں تمام برادریوں کے افراد کو برابر مواقع فراہم کیے جاتے ہیں۔

 

میجر جنرل جولین معظم جیمز کی ترقی نا صرف ان کی ذاتی کامیابی ہے بلکہ پاکستان کی مسیحی برادری اور مسلح افواج کے لیے بھی ایک بڑا اعزاز ہے۔

 

 ان کی محنت، قابلیت اور خدمات نے انہیں ایک مثالی فوجی افسر بنایا ہے اور ان کی ترقی نے پاکستانی مسلح افواج میں مسیحی افسران کے کردار کو مزید مستحکم کیا ہے۔