لڑائی جھگڑوں کیلئے مشہور شکیب الحسن کی کہانی

لاہور: (ویب ڈیسک) شکیب الحسن کرکٹ کی دنیا کا ایک ایسا نام ہے جس کا طویل عرصے سے تعلق تنازعات سے رہا ہے۔ 2007 ء میں بھارت کے خلاف ٹیسٹ میچ سے اپنے بین الاقوامی کرکٹ کیریئر کا آغاز کرنے والے شکیب اب تک مختلف فارمیٹس میں 14 سنچریاں اور 753 وکٹیں لے چکے ہیں۔

شکیب الحسن کو ایک آل راؤنڈر کے طور پر دیکھا جاتا ہے جو ضرورت پڑنے پر اپنے بلے کے ساتھ ساتھ گیند سے مخالف ٹیم کے چھکے بھی چھڑا سکتا ہے۔ لیکن ان کے 15-16 سالہ طویل کیریئر میں کئی ایسے مواقع آئے جب انہیں کرکٹ شائقین کے ساتھ ساتھ سابق کھلاڑیوں اور کرکٹ ماہرین کی تنقید کا سامنا کرنا پڑا۔

تازہ ترین معاملہ 6 نومبر کو دہلی میں کھیلے گئے بنگلا دیش بمقابلہ سری لنکا میچ سے متعلق ہے۔ اس میچ میں بنگلا دیش کے کپتان شکیب الحسن نے ایک ایسا فیصلہ لیا جس کے بعد سری لنکن کھلاڑی اینجلو میتھیوز بین الاقوامی کرکٹ میں ٹائم آؤٹ ہونے والے پہلے کھلاڑی بن گئے۔

پیر کو دہلی کے ارون جیٹلی اسٹیڈیم میں کھیلے گئے میچ میں بنگلا دیش کی ٹیم نے ٹاس جیت کر پہلے گیند بازی کا فیصلہ کیا۔ ایسے میں سری لنکن ٹیم پہلے بیٹنگ کرنے آئی۔ سری لنکن ٹیم نے 24.2 اوورز میں چار وکٹوں کے نقصان پر 135 رنز بنائے تھے۔

چوتھی وکٹ کے طور پر سدیرا سمارا وکرما کے آؤٹ ہونے کے بعد سری لنکن سابق کپتان اینجلو میتھیوز کریز پر آئے تاکہ اپنی ٹیم کا سکور بڑھا سکیں۔ وہ پہلی گیند کا سامنا کرنے والے تھے کہ انہوں نے اپنے ہیلمٹ کا پٹا کھینچا اور کچھ پریشانی محسوس کی۔ اس پر اس نے اپنا ہیلمٹ اتار کر پویلین کی طرف اشارہ کیا۔

میچ سے متعلق وائرل ویڈیو میں دیکھا جا سکتا ہے، “انجیلو میتھیوز کریز پر آئے۔ اس نے جھک کر کریز پر بنی سفید لکیر کو چھوا اور ماتھے پر ہاتھ رکھا۔ پھر ہیلمٹ کا پٹا کھینچا۔ پٹے میں کچھ مسئلہ تھا اور وہ مڑ گیا۔ اس لیے انہوں نے اپنا ہیلمٹ اتار کر پویلین کی طرف اشارہ کیا۔ گویا ایک اور ہیلمٹ لانے کا کہہ رہے ہیں۔

اس دوران بنگلا دیش کے کپتان شکیب الحسن نے مسکراتے ہوئے امپائر سے ٹائم آؤٹ کی اپیل کی۔ تب میتھیوز کو کچھ سمجھ نہیں آیا۔ ویڈیو میں دیکھا جا سکتا ہے کہ میتھیوز نے امپائرز (رچرڈ لنگورتھ اور ماریس ایراسمس) سے بھی رابطہ کیا اور انہیں تاخیر کی وجہ بتانے کی کوشش کی۔

اس دوران امپائرز نے مسکراتے ہوئے شکیب الحسن سے پوچھا کہ کیا وہ میتھیوز کے آؤٹ ہونے کی اپیل کر رہے ہیں؟ اور پھر، شکیب اور ان کی بنگلا دیش ٹیم نے کہا کہ وہ اپیل کے بارے میں سنجیدہ ہیں اور اسے واپس نہیں لے رہے ہیں۔

ویڈیو میں میتھیوز اس کے بعد شکیب کو کچھ کہتے نظر آ رہے ہیں۔ لیکن بالاخر چیزیں کام نہیں کر پائی اور امپائر نے اسے میدان چھوڑنے کو کہا۔ بنگلا دیش نے یہ میچ جیت لیا لیکن اس کے بعد بھی اینجلو میتھیوز کا ٹائم آؤٹ ہونے کی خبریں اگلے دن اخبارات میں سرخیاں بنی۔

میتھیوز کے آؤٹ ہونے کے بعد شکیب الحسن کے اس فیصلے پر سوشل میڈیا اور اسٹیڈیم میں تنقید کا سلسلہ شروع ہوگیا جو اب تک جاری ہے۔ لیکن میچ ختم ہونے کے بعد بنگلا دیش کے کپتان نے اپنے فیصلے کو درست قرار دیا۔ جب ان سے پوچھا گیا کہ کیا سپورٹس مین سپرٹ کا مظاہرہ کرتے ہوئے انہیں اینجلو میتھیوز کو واپس نہیں بلانا چاہیے تھا؟اس پر شکیب الحسن نے کہا کہ ‘ایسی صورتحال میں آئی سی سی کو اس پر غور کرنا چاہیے اور قوانین میں تبدیلی کرنی چاہیے۔’

کچھ رپورٹس کے مطابق میچ کے بعد میڈیا سے بات کرتے ہوئے شکیب الحسن نے یہاں تک کہہ دیا کہ انہیں ایسا لگتا ہے جیسے وہ کوئی جنگ لڑ رہے ہوں۔ اس معاملے پر اپنا تبصرہ کرتے ہوئے اینجلو میتھیوز نے کہا ہے کہ یہ شکیب الحسن اور بنگلا دیش کی جانب سے شرمناک تھا۔ اگر وہ اس قسم کی کرکٹ کھیلنا چاہتے ہیں تو اس میں کچھ گڑبڑ ہے۔ یہ واضح طور پر شرمناک ہے۔ آج تک میں شکیب کی بہت عزت کرتا تھا لیکن اس نے سب کچھ کھو دیا۔ ہمارے پاس ویڈیو ثبوت ہیں، ہم بعد میں پیش کریں گے۔

لیکن یہ پہلا واقعہ نہیں جب شکیب الحسن اپنے رویے کی وجہ سے دنیا بھر میں تنقید کا نشانہ بنے۔

کیمرے پر فحش اشارہ :

2014 ء میں، شکیب الحسن کو ڈھاکہ میں سری لنکا کے خلاف ون ڈے میچ کھیلتے ہوئے تین ون ڈے میچز کی پابندی اور تین لاکھ بنگلا دیشی ٹکاکے جرمانے کا سامنا کرنا پڑا۔ اس میچ میں بنگلا دیش کی ٹیم 290 رنز کے ہدف کا تعاقب کر رہی تھی اور شکیب الحسن صرف 24 رنز بنانے کے بعد آؤٹ ہوئے۔

اس کے بعد مبصرین کی طرف سے ان کی برطرفی کا کچھ دیر تک چرچا رہا۔ اس بحث کے دوران ہی جب ٹی وی کیمرہ پویلین میں بیٹھے شکیب الحسن کی طرف گیا تو انہوں نے انتہائی ناشائستہ اشارہ کیا۔ اس ناشائستہ حرکت کو پوری دنیا کے ساتھ ساتھ اسٹیڈیم میں بیٹھے تماشائیوں نے بھی براہ راست دیکھا۔ اس معاملے میں انہیں پابندی اور جرمانے کے ساتھ ساتھ کڑی تنقید کا بھی سامنا کرنا پڑا۔

سٹمپ توڑنے کی ویڈیو وائرل:

اس واقعے کے بعد شکیب الحسن کی ایسی کئی ویڈیوز سوشل میڈیا پر وائرل ہو رہی ہیں جن میں ان کے رویے کو کھیل کی روح کے منافی قرار دیا جا رہا ہے۔ ان میں سے ایک ویڈیو میں شکیب الحسن سٹمپ کو اکھاڑ کر زمین پر پھینکنے کے ساتھ ساتھ امپائر کے ساتھ بدتمیزی کرتے نظر آ رہے ہیں۔ یہ ویڈیو سال 2021 ء میں کھیلے گئے میچ کی ہے جس کا تعلق ڈھاکہ پریمیئر لیگ سے بتایا جاتا ہے۔

گرائونڈ ورکر کو مارنے کی دھمکی :

2010 ء میں بنگلا دیش اور نیوزی لینڈ کے درمیان کھیلے گئے میچ کے دوران شکیب الحسن پر الزام تھا کہ انہوں نے گراؤنڈ اسٹاف کو بلے سے مارنے کی دھمکی دی تھی۔ اس میچ کے دوران شکیب الحسن 92 رنز کے اسکور پر تھے کہ سائیٹ اسکرین کے قریب کچھ ایسی حرکت ہوئی جسے ایمپائر روک نہ سکے۔ایسے میں شکیب الحسن خود سائٹ اسکرین کی طرف بھاگے، اس کے قریب کھڑے شخص کو گالی دی اور اسے بلے سے مارنے کی دھمکی دی ۔اس میچ کے بعد انہیں میچ ریفری نے وارننگ دی لیکن ان کے خلاف کوئی کارروائی نہیں کی گئی۔

جب ڈریسنگ روم میں شیشے کا دروازہ ٹوٹا:

خبر رساں ادارے اے ایف پی کے مطابق 2018 ء میں نداہاس ٹرافی کے دوران ہونے والے میچ میں سری لنکا اور بنگلا دیش کے درمیان سخت مقابلہ ہوا۔ اس میچ کے دوران اس وقت کافی تنازعہ ہوا جب ایمپائر نے نو بال کے حوالے سے اپنا فیصلہ پلٹ دیا۔اس دوران شکیب الحسن نے غصے میں اپنے کھلاڑی کو کریز سے واپس بلانے کا فیصلہ کیا۔ لیکن اس کے بعد بنگلا دیش کے ڈریسنگ روم میں شیشے کا دروازہ ٹوٹنے کی خبر آئی، اس معاملے پر شکیب الحسن نے معذرت کرتے ہوئے کہا کہ وہ اور ان کے کھلاڑی جذباتی ہو گئے تھے۔