ٹیکسٹائل مصنوعات کی برآمدات میں معمولی کمی
![Image](/enews/2024/May/05-18-24/news_big_images/_77384687.jpg)
May, 18 2024
اسلام آباد:(اے پی پی) ٹیکسٹائل مصنوعات کی برآمدات میں جاری مالی سال کے پہلے 10 ماہ میں سالانہ بنیادوں پر 0.2 فیصد کی معمولی کمی ریکارڈ کی گئی ہے۔
پاکستان بیورو برائے شماریات کی جانب سے اس حوالہ سے جاری کردہ اعدادوشمار کے مطابق جولائی 2023ء سے لے کر اپریل 2024 ءتک کی مدت میں ٹیکسٹائل مصنوعات کی برآمدات سے ملک کو 13.68 ارب ڈالر زرمبادلہ حاصل ہوا جو گذشتہ مالی سال کی اسی مدت کے مقابلہ میں 0.2 فیصد کم ہے،
گذشتہ مالی سال کی اسی مدت میں ٹیکسٹائل مصنوعات کی برآمدات کا حجم 13.70 ارب ڈالر ریکارڈ کیا گیا تھا، اپریل میں ٹیکسٹائل مصنوعات کی برآمدات کا حجم 1.237 ارب ڈالر ریکارڈ کیا گیا جو گزشتہ سال اپریل کے مقابلہ میں 0.4 فیصد زیادہ ہے۔
گذشتہ سال اپریل میں ٹیکسٹائل کی برآمدات سے ملک کو1.233 ارب ڈالر زرمبادلہ حاصل ہوا تھا۔
مارچ کے مقابلہ میں اپریل میں ٹیکسٹائل کی برآمدات میں ماہانہ بنیادوں پر 4.8 فیصد کی کمی ہوئی ہے۔ مارچ میں ٹیکسٹائل کی برآمدات کا حجم 1.30 ارب ڈالر ریکارڈ کیا گیا تھا۔